Էրդողան. «Ես կհեռանամ այս պաշտոնից, արդյո՞ք Պուտինն էլ կհեռանա»

Քաղաքական07:42, 01 Դեկտեմբեր 2015

Էրդողան. «Ես կհեռանամ այս պաշտոնից, արդյո՞ք Պուտինն էլ կհեռանա»

Թուրքիայի նախագահ Ռեջեփ Թայիփ Էրդողանը պատասխանել է Ռուսաստանի նախագահ Վլադիմիր Պուտինի՝ Փարիզում հնչեցրած այն հայտարարություններին, ըստ որոնց թուրքերը ռուսական ինքնաթիռը խոցել է, որպեսզի ապահովի «Իսլամական պետություն» (ԻՊ) ահաբեկչական կազմակերպությունից նավթի ազատ մատակարարումը Թուրքիա:

Փարիզում տեղի ունեցած ՄԱԿ-ի կլիմայական փոփոխությունների հարցերով գագաթնաժողովի ավարտին լրագրողների հետ զրույցում Էրդողանը մասնավորապես ասել.

«Եթե այդ պնդումներն ապացուցվեն ես կհեռանամ պաշտոնից, բայց նաև ուզում եմ հարցնել Պուտինին` իսկ դու կհեռանա՞ս: Ի դեպ «Իսլամական պետություն» ահաբեկչական կազմակերպությունից նավթ գնող անձանցից մեկը, ինչպես հայտարարել է ԱՄՆ-ի ֆինանսների նախարարը, Ռուսաստանի և Սիրիայի քաղաքացի հանդիսացող Ջորջ Հասասին է: Նա դրա մասին թող հայտարարեն: Զրպարտություններով առաջ շարժվել չեն կարող»:

Էրդողանը պնդել է, որ մինչև օրս նման բան չի եղել, իրենք միմիայն օրինական ճանապարհներով են նավթ գնել:

Վերջինս շեշտել է նաև, որ իրենց ջանքերով է զոհված ռուս օդաչուի աճյունը թուրքմենների կողմից հանձնվել թուրքական կողմին, ապա ուղարկվել Ռուսաստան:

Ավելի վաղ Պուտինը Փարիզում հայտարարել էր, որ նոր փաստեր ունեն Թուրքիայի` ԻՊ-ից նավթ գնելու մասին: «Խնդիրը Սիրիայի թուրքմեն ժողովրդին պաշտպանելը չէ: Թուրքմենները առիթ են: Եվս մեկ անգամ համոզվում ենք, որ մեր ինքնաթիռին հարվածել են նավթի բեռնատարների անվտանգ մուտքը դեպի Թուրքիա ապահովելու համար»,- ասել էր ՌԴ նախագահը: Նա անդրադարձել էր նաև թուրքական կողմի այն հայտարարություններին, որոնցում շեշտվում է, թե ինքնաթիռը խոցելու հրամանը Էրդողանը չի տվել:

«Մեզ համար արդեն այդ հանգամանքը որևէ կարևորություն չի ներկայացնում»,- նշել է Պուտինը:

Աղբյուր` Ermenihaber.am