Թուրքիայի ԱԳՆ-ն Խոջալուի դեպքերի կապակցությամբ հայտարարություն է տարածել

Քաղաքական07:20, 26 Փետրվար 2016

Թուրքիայի ԱԳՆ-ն Խոջալուի դեպքերի կապակցությամբ հայտարարություն է տարածել

Թուրքիայի արտաքին գործերի նախարարությունը (ԱԳՆ) Խոջալուի դեպքերի 24-րդ տարելիցի կապակցությամբ ադրբեջանական կեղծ թեզերը պաշտպանող գրավոր հայտարարություն է տարածել:

Նախարարության պաշտոնական կայքում տեղադրված հայտարարությամբ Խոջալուի ողբերգական դեպքերի մեջ մեղադրվում է հայկական զինուժը, իսկ Հայաստանն էլ՝ «Ադրբեջանի տարածքների 20 տոկոսն օկուպացրած պահելու» մեջ:

Թուրքիայի ԱԳՆ-ն ցավակցություն է հղել «ադրբեջանցի եղբայրներին» և ափսոսանք հայտնել, որ Խոջալուի դեպքերը միջազգային հանրության կողմից դեռևս բավականաչափ հետաքրքվածության չեն արժանացել:

Հիշեցնենք, որ ըստ Human Rights Watch միջազգային իրավապաշտպան կազմակերպության տվյալների՝ 1992 թվականի փետրվարի 26-ին Արցախյան պատերազմի ընթացքում Աղդամ քաղաքի մատույցներում չբացահայտված պայմաններում մահացել է 200-300 հոգի: Խոջալուն հանդիսանում էր այն 5 կրակակետերից մեկը, որտեղից ինտենսիվ կրակ էր բացվում շրջափակված Ստեփանակերտի ուղղությամբ: Խոջալուի բնակչությունն ամիսներ շարունակ բռնի կերպով պահվում էր բնակավայրում և մտածված չէր տարհանվում Ադրբեջանի իշխանությունների կողմից` հետագայում նրանց որպես «կենդանի վահան» օգտագործելու նպատակով:

Խոջալուի բնակիչները, որոնք լքել էին բնակավայրը ԼՂՀ Ինքնապաշտպանական ուժերի տրամադրած մարդասիրական միջանցքով, անարգել անցել են ավելի քան 10 կմ` հասնելով ադրբեջանական ուժերի կողմից վերահսկվող Աղդամ քաղաք: Ավելի ուշ ադրբեջանական զորքերի տեղակայման վայրից ոչ հեռու հայտնաբերվել են բնակավայրի մահացած բնակիչների դիերը: Զոհերի ստույգ թիվը դեռևս անհայտ է, քանի որ պաշտոնական Բաքուն հրապարակում է միմյանց հակասող թվեր: Ադրբեջանի խորհրդարանի` այս բնակիչների ողբերգական մահվան հետաքննությամբ զբաղվող հանձնաժողովը ցրվել է Հեյդար Ալիևի հրամանով, իսկ հետաքննական նյութերը գաղտնիացված են:

Աղբյուր` Ermenihaber.am