Թուրք լրագրողը պահանջում է չեղարկել ՑԵղասպանությունը ճանաչած շվեյցարացի երաժշտի ստամբուլյան համերգը

Ցեղասպանություն07:56, 19 Սեպտեմբեր 2016

Թուրք լրագրողը պահանջում է չեղարկել ՑԵղասպանությունը ճանաչած շվեյցարացի երաժշտի ստամբուլյան համերգը

2016թ. հոկտեմբերի 22-ին նախատեսված է շվեյցարացի անվանի երաժիշտ և երաժշտագետ Ջորդի Սավալի համերգը Ստամբուլի Ջեմալ Ռեշիթ Ռեյ համերգասրահում: Թուրքական իշխանամետ «Yeni Şafak» թերթի հոդվածագիր Յալչըն Չեթինքայան անդրադարձել է Հայոց ցեղասպանության ճանաչմանը աջակցություն ցուցաբերած Սավալի՝ Թուրքիայում համերգով հանդես գալու նպատակահարմարությանը:

Միջանկյալ հիշեցնենք, որ 2015թ. օգոստոսի 14-16-ին Իսպանիայի Պոբլետ քաղաքի (Կատալոնիա) վանական համալիրում տեղի էր ունեցել հնագույն երաժշտության փառատոն, որի տնօրենը Ջորդի Սավալն էր: Փառատոնը եզրափակվել էր Հայոց ցեղասպանության հիշատակին նվիրված «Հայ ոգի» խորագրով համեգով:

Բացի այդ, Ջորդի Սավալի անվան հիմնադրամի ղեկավար Մանուել Ֆորկանոն 2015թ. ապրիլի 21-ին Բարսելոնայում «Ցեղասպանության մշակութային հետևանքները, մասնավորապես, երաժշտության և գրականության տեսակետից» վերնագրով մի զեկույց էր ներկայացրել՝ ի հիշատակ Հայոց ցեղասպանության:

«Պետք էր սպասել, որ Ջորդի Սավալը, որպես Հայոց ցեղասպանության ճանաչմանն աջակցող արվեստագետ, կմերժի Թուրքիայից ստացված համերգի հրավերը: Բայց եթե, այնուամենայնիվ, որոշել է գալ Թուրքիա, ապա անհրաժեշտ է համերգից առաջ մամուլի ասուլիս հրավիրել, թուրք ժողովրդին իրավիճակը մեկնաբանել և ներողություն խնդրել», - գրում է Չեթինքայան:

Նա քննադատում է նաև այն թուրք արվեստագետներին, որոնք Սավալի հրավերով մասնակցել կամ մասնակցում են վերջինիս համերգներին: Չեթինքայան կոչ է անում այդ երաժիշտներին՝ չմտածել միայն անձնական շահի ու հեղինակության մասին և որպես հակազդեցություն Սավալի հայամետ ելույթների՝ հրաժարվել նրա հետ համագործակցությունից:

Չեթինքայան նույնիսկ առաջարկում է Մադրիդում Թուրքիայի դեսպանատան և (եթե գոյություն ունի) Բարսելոնայում Թուրքիայի հյուպատոսարանի միջոցով անվանի երաժշտից պահանջել, որ ներողություն խնդրի թուրքերից: Ինչպես նաև՝ այլ երկրներում Թուրքիայի բոլոր ներկայացուցչություններին պատվիրել՝ նմանատիպ մոտեցում ցուցաբերել Հայոց ցեղասպանության ճանաչմանն ուղղված գործունեություն ծավալող արվեստագետների նկատմամբ:

Ըստ հոդվածագրի՝ Ստամբուլի Ջեմալ Ռեշիթ Ռեյ համերգասրահը պետք է վճռականություն ցուցաբերի և եթե Սավալը ներողություն չխնդրի, նրա ստամբուլյան համերգը պիտի չեղյալ հայտարարվի:

Նշենք նաև, որ անցյալ շաբաթ Կատալոնիայի Պրադես գյուղի վանական համալիրում կազմակերպված համերգը Ջորդի Սավալը կրկին նվիրել էր թուրքերի կազմակերպած հայկական ջարդերի հիշատակին, իսկ հաջորդ օրը հեռուստատեսային մի ելույթի ժամանակ դարձյալ անդրադարձել Ցեղասպանության թեմային:

Աղբյուր` Ermenihaber.am

Այս ենթաբաժնի վերջին նորությունները

23:06, 24 ապր

Հայոց ցեղասպանությունը՝ ականտես-վերապրողի վկայությամբ

Այս պատմությունն ականատես-վերապրողի՝ շատախցի Մարուսյա Հակոբյանի խնդրանքով և թելադրանքով է հուշագրված։

16:41, 24 ապր

Թուրք կուսակցապետ. «Առանց պատմության ծանր բեռի հետ առերեսվելու՝ Թուրքիայում հնարավոր չէ երջանիկ ու խաղաղ ապագա»

Թուրքիայում գործող սոցիալիստական կուսակցության առաջնորդ Սեյիթ Ասլանը Հայոց ցեղասպանության 110-րդ տարելիցի կապակցությամբ հանդես է եկել գրավոր հայտարարությամբ։