Պուտինն ու Էրդողանը պայմանավորվել են խորացնել համագործակցությունը ամենատարբեր ոլորտներում

Քաղաքական08:11, 11 Հոկտեմբեր 2016

Պուտինն ու Էրդողանը պայմանավորվել են խորացնել համագործակցությունը ամենատարբեր ոլորտներում

Ռուսաստանի և Թուրքիայի նախագահներ Վլադիմիր Պուտինն ու Ռեջեփ Թայիփ Էրդողանը Ստամբուլում տեղի ունեցած 1 ժամ 40 րոպեանոց հանդիպումից հետո համատեղ մամուլի ասուլիսով են անցկացրել: Ասուլիսի սկզբում ելույթ ունեցած Էրդողանը հայտարարել է, որ ռուս պաշտոնակցի հետ հնարավորություն են ունեցել մանրամասն քննարկել առևտրատնտեսական, արդյունաբերական, քաղաքական ու տարածաշրջանային թեմաներ: Վերջինս հայտնել է, որ հանդիպումներ են տեղի ունեցել 2 երկրների համապատասխան նախարարությունների պատվիրակությունների միջև, որոնք դեռև կշարունակվեն առաջիկա 2 օրում:

Էրդողանը, սկզբում խոսել է համատեղ էներգետիկ նախագծերի մասին` տեղեկացնելով, որ համաձայնագիր են ստորագրել «Թուրքական հոսք» գազատարի շինարարության արագացման վերաբերյալ:

«Այսօր դրված ստորագրություններով վերջնականապես լուծեցինք «Թուրքական հոսքի» շինարարության արագացման հարցը: Մեր մյուս համատեղ նախագծի` Աքքույուի ատոմակայանի շինարարությանն արագացնելու վերաբերյալ ևս հստակ համաձայնություն ձեռք բերեցինք: Վատահ եմ, որ առաջիկայում հետ կբերենք կորցրած ժամանակը»,- ասել է Էրդողանը:

Թուրքիայի նախագահի տեղեկացմամբ՝ հանդիպմանը քննարկվել են նաև տարածաշրջանային հարցերը, մասնավորապես սիրիական ճգնաժամը:

«Առիթ ունեցանք բազմակողմանիորեն քննարկելու Սիրիայի թեման: Պուտինի հետ խոսեցինք նաև մեր կողմից իրականացվող «Եփրատի վահան» օպերացիայի և դրա շրջանակներում հնարավոր համագործակցության մասին: Խոսել ենք Հալեպում հումանիտար օգնություն հասցնելու և ժամ առաջ այնտեղ հրադադարի հաստատման ուղիների մասին: Այս թեմայով համապատասխան հանձնարարականներ ենք տվել ԶՈւ գլխավոր շտաբների պետերին և ազգային հետախուզական ծառայությունների ղեկավարներին»,- տեղեկացրել է Թուրքիայի նախագահը:

Պուտինն էլ նշել է, որ «Թուրքական հոսք» գազատարի վերաբերյալ համաձայնագիրը կնքելուց հետո պայմանավորվածություն են ձեռք բերել նաև բնական գազի համար Թուրքիային տրամադրվելիք զեղչի վերաբերյալ:

Պուտինը նաև նշել է, որ երկու երկրները լրացուցիչ ջանքեր կգործադրեն հարաբերությունների կարգավորման գործընթացը հնարավորինս շուտ ավարտին հասցնելու համար:

ՌԴ նախագահը հայտարարել է նաև, որ երեկ Ռուսաստանի կառավարությունը որոշում է ընդունել չեղյալ հայտարարել Թուրքիայից ներմուծվող բոլոր մրգերի ու բանջարեղենների վերաբերյալ գործող սահմանափակումները:

Պուտինն անդրադարձել է նաև 2 երկրների միջև ամենատարբեր ոլորտներում ծավալվող համագործակցության ընդլայմանը` ավելացնելով, որ դրանք մանրամասնորեն կքննարկվեն համատեղ տնտեսական հանձնաժողովի առաջիկա նիստին:

Աղբյուր` Ermenihaber.am