Թուրքիան և Հորդանանը ստորագրել են տնտեսական համագործակցության հուշագիր

«Թուրքիա-Հորդանան խառը տնտեսական հանձնաժողովի» (KEK) շրջանակներում երկու երկրների միջև տնտեսական համագործակցության հուշագիր է կնքվել։ Փաստաթուղթը ստորագրել են Թուրքիայի առևտրի նախարար Օմեր Բոլաթը և Հորդանանի արդյունաբերության, առևտրի և մատակարարման նախարար Յարուբ ալ-Քուդաթը։

Բոլաթի խոսքով՝ ստորագրված հուշագիրը ներառում է առևտրի, ներդրումների, շինարարության, արդյունաբերության, գյուղատնտեսության, առողջապահության, մշակույթի և տուրիզմի ոլորտներում համագործակցության կոնկրետ և կառուցողական դրույթներ։

Նախարար Բոլաթն անդրադարձել է նաև երկու երկրների միջև առևտրային հարաբերություններին՝ նշելով, որ դրանք զարգանում են «win-win» սկզբունքով։ 2024-ին կողմերի առևտրաշրջանառությունը գերազանցել է 1.1 մլրդ դոլարը, իսկ 2025-ի առաջին 9 ամսում՝ հասել մոտ 1.5 մլրդ դոլարի։

Առաջիկայում նախատեսվում է ստորագրել նոր համաձայնագրեր ազատ տնտեսական գոտիների, փոքր ու միջին ձեռնարկությունների, կազմակերպված արդյունաբերական տարածքների, ստանդարտացման, կրթության, առողջապահության, գիտական հետազոտությունների և գյուղատնտեսության ոլորտներում։

Ըստ նախարարի՝ Թուրքիան և Հորդանանը պատրաստ են համատեղ քայլերի նաև Սիրիայի, Գազայի և Արևմտյան ափի վերականգնման, ինչպես նաև Մերձավոր Արևելքի պատմական տրանսպորտային միջանցքի վերագործարկման ուղղությամբ։

Աղբյուր՝ Asigazetesi