Անկարայում Գերմանիայի կանցլերը պաշտպանել է Իսրայելին, իսկ Էրդողանը՝ հակադարձել

Հոկտեմբերի 30-ին Անկարայում հանդիպել են Թուրքիայի նախագահ Ռեջեփ Թայիփ Էրդողանն ու Գերմանիայի կանցլեր Ֆրիդրիխ Մերցը:

Հանդիպումից հետո կողմերը համատեղ մամուլի ասուլիս են տվել՝ անդրադառնալով երկու պետությունների միջև քննարկվող մի շարք հարցերի:

Էրդողանը տեղեկացրել է, որ որպես երկու ՆԱՏՕ անդամ դաշնակից քննարկել են ընդհանուր շահերի հիմքով երկկողմ հարաբերությունները և միջազգային մի շարք խնդիրներ:

«Բացի այդ, մենք նշել ենք, թե ինչ սպասումներ ունենք իրենցից մեր կողմից ռազմավարական համարվող Եվրամիությանն ամբողջությամբ անդամակցելու հարցում»:

Թուրքիայի նախագահը խոսել է նաև երկու պետությունների միջև առկա առևտրային հարաբերություններից՝ ընդգծելով, որ Գերմանիան Եվրոպայում Թուրքիայի համար ամենամեծ առևտրային գործընկերն է:

«Նպատակ ունենք 50 մլրդ դոլարի հասած մեր առևտրաշրջանառությունը մոտ ժամանակներս հասցնել 60 մլրդ դոլարի: Հարգարժան կանցլերի հետ քննարկել ենք այս առումով թե՛ մեր առևտրի, թե՛ համատեղ ներդրումների համար բարձր մակարդակ ապահովող ռազմական համագործակցության հարցը»,-հավելել է նա:

Մամուլի ասուլիսի ընթացքում անդրադարձ է կատարվել նաև Մերձավոր Արևելքում տիրող իրավիճակին, ինչի համատեքստում Մերցն ընդգծել է մշտապես Իսրայելի կողքին լինելու մասին, ինչպես նաև, որ վերջինս օգտագործել է ինքն իրեն պաշտպանելու իրավունքը:

Մերցի նման խոսքերին հակադարձել է Թուրքիայի նախագահ Ռեջեփ Թայիփ Էրդողանը՝ նշելով, որ վերջինիս հետ չի համաձայնվում այդ հարցում, ապա ասել.

«Ափսոս, որ մի անգամ այս գործընթացում ավելի քան 60.000 երեխա, կին և տարեց սպանվեց: ՀԱՄԱՍ-ի ձեռքին հրթիռներ չկան, միջուկային զենք չկա, սակայն այս ամենն Իսրայելն ունի և Իսրայելը, այս զենքերն օգտագործելով, օրինակ երեկ երեկոյան կրկին հարվածել է հենց Գազային:

Դուք, որպես Գերմանիա, սա չե՞ք տեսնում: Որպես Գերմանիա, սրանց չե՞ք հետևում»:

Հիշեցնենք, որ Գազայում հրադադարի հաստատման մասին պայմանավորվածությունը ձեռք էր բերվել հոկտեմբերի 9-ին՝ Եգիպտոսի, Կատարի, ԱՄՆ-ի և Թուրքիայի միջնորդությամբ անցկացված Իսրայել-ՀԱՄԱՍ բանակցությունների ընթացքում:

Աղբյուր՝ Trt Haber