Թուրքիայի նախագահ Ռեջեփ Թայիփ Էրդողանն անդրադարձել է նոյեմբերի 11-ին վրաց-ադրբեջանական սահմանին թուրքական օդուժին պատկանող «C130» ռազմական բեռնատար ինքնաթիռի կործանմանը:
Էրդողանը, նշելով, որ այն Թուրքիա է ուղևորվել Ադրբեջանում անցկացված միջոցառումներին մասնակցելուց հետո, խոսել է ինքնաթիռի կործանման հանգամանքները պարզելու ուղղությամբ տարվող աշխատանքների մասին:
«Որոնողափրկարարական աշխատանքներն արագ մեկնարկել են: Տեսանյութեր նկարելու համար Վրաստանի պաշտոնյաների հետ համագործակցությամբ անմիջապես գործի ենք դրել մեր անօդաչու թռչող սարքերը: Նույն օրը 17:00-ին տեղեկություն եղավ ինքնաթիռի մասերը հայտնաբերելու մասին»:
Բացի այդ, Էրդողանը հայտարարել է, որ հաջողվել է գտնել նաև ինքնաթիռի սև արկղը և այժմ ուսումնասիրման աշխատանքներ են մեկնարկել: Վերջինիս տեղեկացմամբ՝ գտնվել է նաև մահացած զինվորականներից ևս մեկի մարմինը: Եվս մեկ դիակի հայտնաբերման համար որոնողական աշխատանքները դեռևս շարունակվում են:
Հիշեցնենք, որ Թուրքիայի պաշտպանության նախարարության համաձայն՝ ինքնաթիռում եղել է 20 զինվորակա, այդ թվում՝ ինքնաթիռի անձնակազմը: Նրանք բոլորն էլ մահացել են: «C130»-ի կործանման պատճառների մասին պաշտոնական հայտարարություն դեռևս չկա:
