Թուրքիայի «Վանի աշխատանքի զարգացման կենտրոնի» (İŞGEM) և Իրանի «Արևմտյան Ադրբեջանի գիտության և տեխնոլոգիաների պարկի» միջև Ուրմիայում ստորագրվել է գիտահետազոտական և գիտատեխնոլոգիական համագործակցության հուշագիր։ Այն նպատակ ունի խորացնել երկու երկրների տնտեսական ու տեխնոլոգիական կապերը և Իրանի ու Թուրքիայի միջև առևտրաշրջանառությունը հասցնել մինչև 30 մլրդ դոլարի, իսկ փոխադարձ զբոսաշրջիկների թվիը՝ 4 մլն-ից մինչև 10 մլն-ի:
Պաշտոնյաների խոսքով՝ համագործակցության շրջանակում աջակցություն կստանան նորաստեղծ տեխնոլոգիական ընկերությունները, իսկ սահմանային անցակետերում առկա մաքսային և տրանսպորտային խնդիրները աստիճանաբար կլուծվեն։ Նշվել է նաև, որ նախաձեռնությունը դիտարկվում է որպես կարևոր քայլ՝ Վանը տարածաշրջանային տեխնոլոգիական և առևտրային կենտրոն դարձնելու ուղղությամբ։
Ուրմիայի առևտրի պալատում անցկացված ստորագրման արարողության ընթացքում հայտարարությամբ է հանդես եկել «İŞGEM»-ի կառավարման խորհրդի նախագահ Մահմուդ Գեդիքը: Վերջինս տեղեկացրել է, որ Վանում գտնվող սկսնակ տեխպնոլոգիական ընկերություններին խորհրդատվական և շուկայավարման աջակցություն են տրամադրում, ապա հավելել. «Մեր նպատակն է այս ընկերություններին 5 տարվա ընթացքում հասցնել միջազգային դաշտ»:
Աղբյուր՝ Van Postası Gazetesi
