Սիրիայի նախագահականի հաղորդմամբ՝ Թուրքիայի նախագահ Ռեջեփ Թայիփ Էրդողանի և Սիրիայի նախագահ Ահմեդ Ալ-Շարան հեռախոսազրույց են ունեցել, որի ընթացքում քննարկվել են Սիրիայի վերջին զարգացումներն ու տարածաշրջանային կայունության ամրապնդման ուղիները։
Կողմերը կարևորել են ահաբեկչության դեմ պայքարի շրջանակում երկու երկրների համապատասխան կառույցների միջև սերտ համակարգման շարունակականությունը։ Ալ-Շարան ընդգծել է, որ Սիրիայի համար առաջնահերթություն է պետական ինքնիշխանության լիարժեք վերականգնումը երկրի ողջ տարածքում, ինչպես նաև՝ քաղաքացիական բնակչության պաշտպանությունն ու Հալեպի շրջանի անվտանգությունը։ Նա նաև նշել է, որ անհրաժեշտ է վերացնել երկրի վերականգնման գործընթացը խոչընդոտող անօրինական զինված խմբավորումները։
Էրդողանն իր հերթին վերահաստատել է Թուրքիայի աջակցությունը Սիրիայի անվտանգության և կայունության ամրապնդմանը՝ ընդգծելով տարածաշրջանային սպառնալիքների պայմաններում համատեղ գործողությունների և համակարգման կարևորությունը։ Կողմերը պայմանավորվել են շարունակել ինստիտուցիոնալ մակարդակով սերտ համագործակցությունը՝ տարածաշրջանում խաղաղության և երկարաժամկետ կայունության հաստատման նպատակով։
Աղբյուր՝ Haber7
