Թուրքիայի նախագահ Ռեջեփ Թայիփ Էրդողանը Եգիպտոս և Սաուդյան Արաբիա կատարած այցերից վերադառնալիս, ինքնաթիռում լրագրողների հետ զրույցում անդրադարձել է ԱՄՆ-ի ու Իրանի միջև լարվածությանը։
Նա մասնավորապես նշել է. «Նախևառաջ մենք անում ենք ամեն ինչ, որպեսզի թուլացնենք ԱՄՆ-ի և Իրանի միջև լարվածությունը՝ առանց ներքաշելու տարածաշրջանը նոր հակամարտության և քաոսի մեջ։ Այդ նպատակով, ինչպես գիտեք, հանդիպում եմ ունեցել ԱՄՆ նախագահ Դոնալդ Թրամփի հետ, իսկ հաջորդ օրն անմիջապես զրույց եմ ունեցել Իրանի նախագահի հետ։ Իրանի արտգործնախարար Աբբաս Արաղչիի հետ էլ Ստամբուլում, իմ արտգործնախարարի մասնակցությամբ, անցկացրել ենք եռակողմ հանդիպում։ Գործընթացը ակտիվ վիճակում ենք պահում։ Մենք հստակ կերպով հայտնել ենք, որ դեմ ենք Իրանի նկատմամբ ռազմական միջամտությունը և այդ դիրքորոշումը փոխանցել ենք մեր գործընկերներին»։
Ըստ Էրդողանի՝ խնդիրների լուծման ճանապարհը բախումները չեն, այլ փոխզիջման գտնելն ու բանակցելն է։
«Կարևոր է, որ բանակցությունների սեղանը ինչ-որ կերպ ձևավորվի ՝ հաշվի առնելով ռազմական լարվածության աճը։ Հուսանք, որ խնդիրները կլուծվեն երկխոսության ճանապարհով և մեր տարածաշրջանում նոր հակամարտություն չի սկսվի։ Մենք ինչպես ղեկավարի մակարդակով դիվանագիտության, այնպես էլ մյուս մակարդակներով իրականացվող հանդիպումների միջոցով կշարունակենք աշխատել բանակցային հարթակը ամրապնդելու համար։ Տեսնենք՝ որքանով այդ հարթակը կընդլայնվի և արդյոք այլ երկրներ ևս կներառվեն գործընթացում»։
Աղբյուր՝ Haberglobal
