Թուրքիայի ազգային հետախուզական ծառայությունը հայտնել է, որ բացահայտել և ձերբակալել է Իսրայելի հետախուզական ծառայության՝ «Մոսադ»-ի օգտին լրտեսական գործունեություն իրականացրած երկու անձի։ Ստամբուլում իրականացված «Մոնիտում» գործողության շրջանակում ձերբակալվել են Մեհմեթ Բուդաք Դերյան և Վեյսել Քերիմօղլուն։
Պաշտոնական հաղորդագրության համաձայն՝ գործողությունն իրականացվել է Ստամբուլի գլխավոր դատախազության և ոստիկանության հակաահաբեկչական վարչության հետ համատեղ։ Հետաքննությամբ պարզվել է, որ Մեհմեթ Բուդաք Դերյան, որը հանքարդյունաբերության ինժեներ է և Մերսինի Սիլիվկե շրջանում զբաղվել է մարմարի հանքավայրի շահագործմամբ, տարիներ շարունակ առևտրային կապերի քողի տակ համագործակցել է «Մոսադ»-ի հետ։ Նշվում է, որ առաջին կապը հաստատվել է դեռևս 2012–2013 թվականներին՝ իբր գործարար առաջարկի շրջանակում։
Ըստ անվտանգության աղբյուրների՝ Դերյան «Մոսադ»-ի հանձնարարությամբ իր գործունեության մեջ ներգրավել է նաև Վեյսել Քերիմօղլուին, որը օգտագործել է իր Մերձավոր Արևելքում ունեցած կապերը՝ Իսրայելի դեմ հանդես եկող պաղեստինցի անձանց վերաբերյալ տեղեկություններ հավաքագրելու համար։ Հավաքված տվյալները և որոշ ռազմավարական օբյեկտների լուսանկարներ փոխանցվել են իսրայելական հետախուզությանը։ Հետաքննությունը նաև պարզել է, որ կապը պահպանվել է գաղտնագրված հաղորդակցության միջոցով, իսկ կասկածյալներից մեկը ենթարկվել է պոլիգրաֆիկ փորձաքննությունների արտասահմանում։
Թուրքիայի ազգային հետախուզական ծառայության գնահատմամբ՝ վերջին հանդիպումների ընթացքում պատրաստվել է ավելի լայնածավալ լոգիստիկ գործողություն, ինչի արդյունքում էլ 2026 թվականի հունվարին որոշում է կայացվել անմիջապես միջամտել։ Ձերբակալվածների նկատմամբ քննչական գործողությունները շարունակվում են։
Աղբյուր՝ TRT Haber
