ԱՄՆ Ներկայացուցիչների պալատի մարդու իրավունքների հանձնաժողովում կայացած լսումների ընթացքում «NASA»-ի գիտաշխատող Սերքան Գյոլգեն ներկայացրել է Թուրքիայում իր կալանավորման պատմությունը և անդրադարձել երկրում իրավական համակարգի վիճակին։
Գյոլգեն նշել է, որ 2016-ի հուլիսի 15-ի հեղաշրջման փորձից հետո Թուրքիայում իրավական գործընթացները քաղաքականացվել են, իսկ բազմաթիվ քաղաքացիներ ենթարկվել են հետապնդումների։ Նրա խոսքով՝ իր դեմ որպես մեղադրանքի հիմք օգտագործվել են այնպիսի հանգամանքներ, ինչպիսիք են համալսարանական կրթությունը, բանկային հաշիվ ունենալը և անձնական կապերը։
Մոտ երեք տարի ազատազրկման մեջ անցկացրած գիտնականը հայտարարել է, որ իր գործը բացառություն չէ, և հազարավոր մարդիկ են հայտնվել նման իրավիճակում։
