Թուրքիայի գանձապետարանի և ֆինանսների նախարար Մեհմեդ Շիմշեքը հայտարարել է, որ կառավարությունը շարունակում է հավատարիմ մնալ գնաճի նվազեցման քաղաքականությանը և ակնկալում է, որ 2026-ի ավարտին գնաճը կհասնի 20%-անոց մակարդակի։
«Ասիական ներդրումային համաժողովի» ելույթում Շիմշեքը նշել է, որ նույնիսկ արտաքին ցնցումների պայմաններում տնտեսական ծրագրի հիմնական ուղղությունը չի փոխվի։ Նրա խոսքով՝ 2025-ին բյուջեի դեֆիցիտը նվազել է մինչև ՀՆԱ-ի 2.9%-ը, իսկ միջնաժամկետ հեռանկարում կառավարությունը նպատակ ունի այն պահել 3%-ից ցածր մակարդակում։
Շիմշեքը հայտարարել է, որ օտարերկրյա ներդրումների ներգրավման նպատակով նախատեսվում են մի շարք հարկային արտոնություններ, այդ թվում՝ արտադրական ընկերությունների համար կորպորատիվ հարկի նվազեցում, ծառայությունների արտահանման ոլորտում հարկային արտոնություններ և բազմազգ ընկերությունների համար նոր խթանիչ ծրագրեր։
Աղբյուր՝ Milliyet
