Թուրքիայի արտգործնախարար Հաքան Ֆիդանը հունիսի 11-ին պաշտոնական այցով կմեկնի Բուլղարիա։ Նշվում է, որ օրակարգում են լինելու երկկողմ համագործակցությունը, Եվրամիությանն (ԵՄ) ինտեգրման գործընթացը, Ուկրաինայի շուրջ տիրող իրավիճակը, Մերձավոր Արևելքի զարգացումները և ԱՄՆ-Իրան բանակցությունները։
Նշվում է, որ քննարկվելու են էներգետիկայի, տրանսպորտի, անվտանգության և ռազմական արդյունաբերության ոլորտներում իրականացվելիք քայլերը։ Ֆիդանը շեշտելու է, որ Բուլղարիան Թուրքիայի համար դեպի Եվրոպա ցամաքային փոխադրումների տեսանկյունից առանցքային հանգույց է, և ակնկալվում է բեռների ու ուղևորների անխափան անցում։
Ֆիդանը բարձրաձայնելու է Անկարայի ակնկալիքները ԵՄ անդամակցության հարցում և այդ հարցում կարևորելու է Սոֆիայի աջակցությունը։ Օրակարգից դուրս չի մնալու ռուս-ուկրաինական պատերազմի ազդեցությանը Սևծովյան տարածաշրջանի վրա և կարևորվելու է Թուրքիայի, Բուլղարիայի ու Ռումինիայի կողմից համատեղ ձևավորված «Սև ծովի ականների դեմ պայքարի աշխատանքային խմբի» (MCM Black Sea) դերը։
Թուրքիայի ԱԳ նախարարը ընդգծելու է Իրանի և ԱՄՆ-ի միջև բանակցությունների շարունակականության կարևորությունը ևս։ Ֆիդանը կանդրադառնա նաև Իսրայելի գործողություններին՝ մեղադրելով վերջինիս Գազայում և Լիբանանում հակամարտությունն ընդլայնելու ու Վաշինգտոն-Թեհրան երկխոսությունը տապալելու փորձերի մեջ։
