Թուրքիայի ձկնաբուծության և ջրային կուլտուրաների ոլորտում արձանագրվել է հանրապետության պատմության ամենաբարձր ցուցանիշը։ Թուրքիայի գյուղատնտեսության և անտառային տնտեսության նախարարության ձկնաբուծության և ջրային արտադրանքի գլխավոր տնօրեն Թուրգայ Թյուրքյըլմազը հայտարարել է, որ 2025-ին արտադրվել է ռեկորդային՝ 1.37 մլն տոննա ծովամթերք, ինչի շնորհիվ ապահովվել է 2.3 մլրդ դոլարի արտահանում և 1.9 մլրդ դոլարի արտաքին առևտրի ավելցուկ։
Արձանագրված աճը հիմնականում պայմանավորված է արհեստական բուծման ծավալների կտրուկ ընդլայնմամբ, որին բաժին է ընկել ընդհանուր արտադրության շուրջ 60%-ը՝ մոտ 630.000 տոննա: Արդյունքում Թուրքիան արհեստական բուծման ծավալներով զբաղեցրել է 1-ին տեղը Եվրոպայում, իսկ Դորադո և Սիբաս ձկնատեսակների բուծման տեսանկյունից դարձել է առաջատարն աշխարհում:
Ընդլայնվել է նաև արտահանման աշխարհագրությունը. թուրքական ձկնամթերքը մատակարարվել է աշխարհի շուրջ 100 երկիր, այդ թվում՝ Եվրամիության երկրներ, որտեղ միայն թուրքական սաղմոնի վաճառքից ստացվել է 500 մլն դոլարի հասույթ։ 2028-ին նախատեսվում է ձկնամթերքի արտահանման ծավալները հասցնել 3 մլրդ դոլարի, իսկ ընդհանուր արտադրությունը՝ 1.250 մլն տոննայի։
Բացի այդ, Թուրքիան պատրաստվում է համաշխարհային շուկա դուրս գալ նաև «Թուրքական խավիար» նոր բրենդով, ինչի համար ներկայումս 12 գործարանում ակտիվորեն իրականացվում է թառափի բուծում։ Ծրագրի վերջնական նպատակն է խավիարի արտադրությունը հասցնել 100 տոննայի՝ երկրի տնտեսությանն ապահովելով ևս 100 մլն դոլարի հավելյալ եկամուտ:
Աղբյուր՝ Son Dakika
