Թուրքիայի էներգետիկայի և բնական պաշարների նախարար Ալփարսլան Բայրաքթարն Անկարայում հանդիպել է Բուլղարիայի էներգետիկայի նախարար Իվա Պետրովայի ու նրա գլխավորած պատվիրակության հետ։ Կողմերը քննարկել են էներգետիկ ոլորտում, մասնավորապես բնական գազի առևտրում համագործակցությունը։
Թուրքիայի էներգետիկ ընկերության՝ «BOTAŞ»-ի և Բուլղարիայի պետական էներգետիկ ընկերության՝ «Bulgargaz» միջև ստորագրվել է բնական գազի ոլորտում համագործակցության զարգացման մասին արձանագրություն։
Կողմերը համաձայնել են շարունակել բանակցությունները՝ գործող բնական գազի համաձայնագրի պայմանները թարմացնելու համար։ Դրա հետ մեկտեղ հայտնել են իրենց համատեղ հանձնառությունը՝ մեծացնելու երկու երկրների միջև բնական գազի փոխանցման հզորությունները և ավելի արդյունավետ օգտագործելու առկա ենթակառուցվածքները։
Բայրաքթարը նշել է, որ ստորագրված արձանագրությունը զգալի ներդրում կունենա ինչպես Թուրքիայի, այնպես էլ Բուլղարիայի էներգետիկ անվտանգության և տարածաշրջանային էներգետիկ կայունության գործում։
Աղբյուր՝ Ekovitrin
