Թուրքիան և Սաուդյան Արաբիան քաղաքաշինության և բնակարանաշինության ոլորտում համագործակցության ընդլայնման վերաբերյալ փոխըմբռնման հուշագիր են ստորագրել: Այս մասին հայտնում են թուրքական լրատվամիջոցները։
Սաուդյան Արաբիայի մայրաքաղաք Էր Ռիադում Թուրքիայի շրջակա միջավայրի, քաղաքաշինության և կլիմայի փոփոխության նախարար Մուրատ Քուրումը հանդիպել է Սաուդյան Արաբիայի քաղաքապետարանների և բնակարանային հարցերի նախարար Մաջիդ բին Աբդուլլահ Էլ-Հուքեյլի հետ:
Ստորագրված փաստաթուղթը նախատեսում է երկկողմ գործակցության խորացում քաղաքային պլանավորման, բնակարանաշինության, ենթակառուցվածքների և «խելացի քաղաքների» ստեղծման ուղղությամբ:
Քուրումը տեղեկություններ է փոխանցել Մեքքայում թուրքական «Emlak Konut Global» ընկերության կողմից իրականացվող «Կյանքը Մեքքայում» (Hayat Mekke) նախագծի վերաբերյալ: Բացի այդ նշվել է, որ կողմերը համաձայնության են եկել նախագծի շրջանակներում օտարերկրյա ներդրողներին բնակարանների վաճառքի հնարավորություն ընձեռելու հարցում:
Աղբյուր՝ Alparslandiyari
