Թուրքիայից 30 տոննա մարդասիրական օգնություն է ուղարկել Վենեսուելա։ Սիմոն Բոլիվարի անվան միջազգային օդանավակայանում օգնություն տեղափոխող ինքնաթիռներին դիմավորել են Կարակասում Թուրքիայի դեսպան Նաջի Այդան Քարամանօղլուն և Վենեսուելայի արտաքին գործերի նախարար Իվան Գիլը։
Դեսպան Քարամանօղլուն իր ելույթում հիշեցրել է, որ 2023-ի փետրվարի 6-ին Թուրքիայում տեղի ունեցած ավերիչ երկրաշարժերի ժամանակ Վենեսուելան փրկարարական ջոկատներ էր ուղարկել Թուրքիա և այժմ, երբ Վենեսուելան է տուժել հզոր երկրաշարժերից, թուրքական կողմն իր հերթին աջակցություն է ցուցաբերում։
«Այսօրվա դրությամբ մեր փրկարարական խմբերն ավարտել են իրենց առաքելությունը և վերադառնում են հայրենիք։ Նրանց հետևից եկած 2 ինքնաթիռն էլ մոտ 30 տոննա հումանիտար օգնություն են հասցրել Վենեսուելա»,- հայտնել է թուրք դիվանագետը։
Թուրքիայի «Աղետների և արտակարգ իրավիճակների վարչության» (AFAD) և Թուրքիայի առողջապահության նախարարության կողմից տրամադրված օգնությունը ներառում է 275 մեծ վրան, վրանային ավանների հիմնման համար անհրաժեշտ սարքավորումներ և շուրջ 7 տոննա բժշկական պարագաներ ու դեղորայք։
Վենեսուելայի ԱԳ նախարար Իվան Գիլն իր հերթին շնորհակալություն է հայտնել Թուրքիայի նախագահ Ռեջեփ Թայիփ Էրդողանին, Թուրքիայի կառավարությանը և ԱԳ նախարար Հաքան Ֆիդանին՝ աղետի առաջին իսկ ժամերից ցուցաբերած աջակցության և օպերատիվ արձագանքի համար։ Նա ընդգծել է, որ Վենեսուելայի ժամանակավոր նախագահ Դելսի Ռոդրիգեսի որոշմամբ՝ թուրք փրկարարներին հանձնվել է «Վենեսուելայի հերոսներ» շքանշանը։
Հիշեցնենք, որ հունիսի 24-ին Վենեսուելայում 39 վայրկյան միջանկյալ տարբերությամբ 7․2 և 7․5 մագնիտուդ ուժգնությամբ 2 խոշոր երկրաշարժ էր տեղի ունեցել։ ՄԱԿ-ի Զարգացման ծրագրի (UNDP) տվյալներով՝ աղետի հասցրած նյութական վնասը գնահատվում է շուրջ 6․7 մլրդ դոլար։ Երկրում դեռևս շարունակվում են որոնողափրկարարական աշխատանքները, և մտահոգություն կա, որ զոհերի ու վիրավորների թիվը կարող է աճել։
Աղբյուր՝ Bursa Hakimiyet
