Թուրքիայի տարբեր նահանգներում՝ Մուղլայում, Անթալիայում և Բալըքեսիրում անտառային հրդեհների դեմ պայքարը շարունակվում է։ Մուղլայի Սեյդիքեմեր շրջանում հուլիսի 29-ին բռնկված հրդեհը քամու ազդեցությամբ տարածվել է դեպի բնակելիտարածքներ, ինչի պատճառով տարհանվել են 408 տների բնակիչներ և շրջանի պետական հիվանդանոցի 45 հիվանդ։
Հրդեհի մարման աշխատանքներում ներգրավված են 25 օդային և 410 ցամաքային տրանսպորտային միջոցներ, ինչպես նաև ավելի քան 1100 աշխատակից։
Անթալիայի Քումլուջա շրջանում հրդեհը հաջողվել է վերահսկողության տակ առնել, սակայն այն վնասել է շուրջ 50 հեկտար տարածք և 15 տուն։ Վերահսկողության տակ են վերցվել Չանաքքալեի Այվաջըք և Յալովայի Արմութլու շրջաններում բռնկված հրդեհները: Տարբեր շրջաններում, ինչպիսիք են Ալանիան, Քաշը և Իզմիրը, իրականացվել են բնակիչների և կենդանիների տարհանման աշխատանքներ։
Բալըքեսիրի նահանգի Գյոմեջ շրջանում հրդեհի դեմ պայքարը շարունակվում է արդեն 2 օր։ Այնտեղից անվտանգության նկատառումներով բնակչությունը տարհանվել է։ Հրդեհներից վնասվել են գյուղատնտեսական տարածքներ, մասնավորապես Այդընում կրակը վնասել է շուրջ 3 հեկտար ձիթապտղի այգի։
Ստեղծված իրավիճակը թուրքական մամուլում բնութագրվում է հիմնականում հետևյալ կերպ. «Թուրքիայի 4 կողմում անտառային հրդեհներ են»:
Աղբյուր՝ Kurdistan24
