Թուրքիայի վիճակագրական ծառայությունը (TÜİK) հրապարակել է 2023-2025 թվականների ժամանակահատվածի «Կյանքի աղյուսակներ» զեկույցը, ըստ որի՝ երկրում ծննդյան պահին կյանքի սպասվող միջին տևողությունը 2022-2024-ին սահմանված 78.1 տարուց հասել է 78.5-ի։
Տվյալների համաձայն՝ տղամարդկանց համար այս ցուցանիշը նախորդ ժամանակահատվածի 75.5-ից դարձել է 75.9 տարի, իսկ կանանց դեպքում՝ 80.7-ից հասել 81.1-ի։ Արձանագրվել է, որ կանայք տղամարդկանցից ապրում են միջինում 5.2 տարի ավելի երկար։ Զեկույցում նշվում է նաև կրթական մակարդակի ազդեցությունը. որքան բարձր է անձի կրթությունը, այնքան երկար է կյանքի սպասվող տևողությունը։
Օրինակ՝ 30 տարեկան բարձրագույն կրթությամբ և ցածր կրթական մակարդակ ունեցող տղամարդկանց միջև կյանքի տևողության տարբերությունը կազմում է 5.1 տարի, իսկ կանանց դեպքում՝ 4.6 տարի:
Իսկ 65 տարեկան անձանց համար կյանքի սպասվող մնացորդային տևողությունը կազմում է միջինում 18.4 տարի, ընդ որում, կանանց դեպքում այն 20 տարի է, իսկ տղամարդկանց մոտ՝ 16.7:
Նշենք նաև, որ չնայած կյանքի ընդհանուր տևողության աճին, ծննդյան պահին «առողջ կյանքի» սպասվող տևողությունը, որը ենթադրում է առանց առողջական լուրջ խնդիրների ապրած տարիները, կազմում է 58 տարի։ Այս ցուցանիշով տղամարդիկ առաջատար են. նրանց առողջ կյանքի տևողությունը 59.1 տարի է, ինչը 2.2 տարով գերազանցում է կանանց 56.9 տարի ցուցանիշը:
Աղբյուր՝ T24
