Թուրքիայի նախագահ Ռեջեփ Թայիփ Էրդողանը Անկարայում Պաղեստինի նախագահ Մահմուդ Աբբասի հետ հանդիպումից հետո հայտարարել է, որ Թուրքիան կշարունակի բոլոր հարթակներում ամենուժեղ կերպով պաշտպանել Պաղեստինի դատը։ Նա ընդգծել է, որ Անկարան հետևողականորեն պայքարելու է 1967-ի սահմանների հիման վրա՝ Արևելյան Երուսաղեմ մայրաքաղաքով անկախ և ինքնիշխան Պաղեստին պետության ստեղծման համար։
Էրդողանը խստորեն քննադատել է Իսրայելի վարչապետ Բենյամին Նեթանյահուի կառավարությանը՝ նրան մեղադրելով Հորդանան գետի արևմտյան ափին և Երուսաղեմում իրականացվող «ցեղասպանական» քաղաքականության և ապօրինի գործողությունների համար։ Ըստ նրա՝ միայն 2026-ին Իսրայելի գործողությունների հետևանքով շուրջ 3․800 պաղեստինցի տեղահանվել է, իսկ մոտ 100-ը՝ սպանվել։
Թուրքիայի նախագահը նաև կոչ է արել իսլամական աշխարհին և ողջ մարդկությանը ստանձնել ընդհանուր պատասխանատվություն Պաղեստինի հարցում։ Հանդիպման ավարտին Էրդողանը նաև անդրադարձել է Յալովայում թռիչքի ժամանակ թուրքական ուսումնամարզական F-16 կործանիչի վթարին։
Նշենք, որ Պաղեստինի դատը պատմաքաղաքական հասկացություն է, որը վերաբերում է պաղեստինցի ժողովրդի ինքնորոշման, սեփական անկախ պետություն ունենալու իրավունքին և արաբա-իսրայելական հակամարտության արդարացի հանգուցալուծմանը։
Աղբյուր՝ TRT Haber
