Ռուսաստանի ԱԳՆ մամուլի խոսնակ Մարիա Զախարովան արձագանքել է լուրերին, թե ԱՄՆ-ն պատրաստվում է հավանություն տալ Թուրքիայում պահվող ամերիկյան սպառազինության տեղափոխմանը Ուկրաինա։ Նա շեշտել է, որ նման քայլը լրջորեն կխարխլի Մոսկվայի, Անկարայի և Վաշինգտոնի միջև առկա փոխադարձ վստահությունը։
Ըստ շրջանառվող տեղեկությունների՝ Վաշինգտոնը պատրաստվում է թույլատրել Թուրքիայի պահեստներում գտնվող շուրջ 280 մլն դոլար արժողությամբ 70 միավոր «ATACMS» հրթիռների վերավաճառքը Կիևին։ Մարդու իրավունքների վերաբերյալ մոնիթորինգ իրականացնող ամերիկյան «Human Rights Watch» կազմակերպության տվյալներով՝ գործարքը վերաբերում է նաև 12 համազարկային կրակի ռեակտիվ համակարգերին և տասնյակ հազարավոր արգելված կասետային ռազմամթերքին:
Զախարովան հավելել է, որ խաղաղության մասին հայտարարություններին զուգահեռ Ուկրաինային զենք մատակարարելը նշանակում է բացել «Պանդորայի արկղը»։ Մոսկվայի ներկայացուցիչը նաև ընդգծել է, որ սա անխուսափելիորեն կվնասի Ռուսաստանի երկկողմ հարաբերությունները թե՛ Թուրքիայի, թե՛ ԱՄՆ-ի հետ։
Նշենք, որ «Պանդորայի արկղ» նշանակում է «մեծ ու անսպասելի տհաճությունների ցանկացած աղբյուր», «փորձանքների, դժբախտությունների աղբյուր»: Բացել այդ արկղը նշանակում է փորձանքների, անախորժությունների սկիզբ տալ և դառնալ դժբախտությունների պատճառ։
Աղբյուր՝ Sözcü
