ԱՄՆ-ում թուրքական համայնքին և թուրք-ամերիկյան հարաբերություններին առնչվող հարցերով զբաղվող կազմակերպությունների ներկայացուցիչներ հանդիպել են ԱՄՆ Կոնգրեսի ավելի քան 50 անդամի և նրանց փոխանցել իրենց պատրաստած համատեղ նամակը։
Այդ նամակում ընդգծվել է Թուրքիայի և ԱՄՆ-ի միջև երկարամյա դաշնակցային հարաբերությունների կարևորությունը, ինչպես նաև շեշտվել, որ երկու երկրների միջև համագործակցությունը կարևոր նշանակություն ունի տարածաշրջանային և գլոբալ անվտանգության տեսանկյունից։
ԱՄՆ-ում գործող թուրք-ամերիկյան կազմակերպությունները նախաձեռնություն են սկսել՝ ապահովելու համար, որ Թուրքիան կրկին հասանելիություն ստանա F-35 կործանիչներին։
Կոնգրեսի անդամներին փոխանցված նամակում նշվում է, որ Թուրքիայի և ԱՄՆ-ի միջև ռազմական համագործակցությունը նպաստում է երկու երկրների ընդհանուր շահերին։
«Խնդրում ենք աջակցել ԱՄՆ-ի կողմից F-35 կործանիչների վաճառքին և վերացնել այս համագործակցության ճանապարհին կանգնած անհարկի պատժամիջոցներն ու խոչընդոտները»,- ասվում է վերոնշյալ նամակում։
Թուրք-ամերիկյան կազմակերպությունները պնդել են, որ F-35-ների վաճառքը պետք է դիտարկել ոչ միայն Թուրքիայի և ԱՄՆ-ի միջև ռազմական հարաբերությունների, այլ նաև ՆԱՏՕ-ի անվտանգության և տարածաշրջանային կայունության համատեքստում։
Աղբյուր՝ kisadalga.net
