Հուլիսի 29-ին պաշտոնապես ավարտվել է Թուրքիայի և Իրանի միջև 25 տարով կնքված բնական գազի մատակարարման պայմանագիրը։ Գազային խոշոր համաձայնագրի ավարտը նոր փուլ է նշանավորում երկու երկրների էներգետիկ հարաբերություններում. Անկարան այժմ ունի գազի ներկրման ավելի շատ այլընտրանքային տարբերակներ, մինչդեռ Թեհրանը կանգնած է իր ամենահուսալի արտահանման շուկաներից մեկը կորցնելու վտանգի առաջ։
Թավրիզ-Անկարա գազատարով իրականացվող մատակարարումներով Թուրքիան տարեկան ստանում էր մինչև 9.6 մլրդ խմ գազ։ Ընթացիկ տարվա հունիսին Իրանը Թուրքիային մատակարարել էր 883 մլն խմ գազ՝ զբաղեցնելով 2-րդ տեղը Ադրբեջանից հետո։ Իրավիճակի վրա էապես ազդում են նաև Իրանի դեմ կիրառվող ԱՄՆ պատժամիջոցները, որոնցով Վաշինգտոնը սահմանափակում և արգելում է իրանական նավթի ու գազի գնումները։
Թուրքական կողմը նշում է, որ պայմանագրի կնքման ժամանակաշրջանի համեմատ Թուրքիան ներկայումս գտնվում է անհամեմատ ավելի հզոր դիրքերում։ Մինչ Ռուսաստանը շարունակում է Թուրքիայի համար մնալ կարևոր մատակարար «Կապույտ հոսք» (Mavi Akım) և «Թուրքական հոսք» (Türk Akımı) գազատարներով, Ադրբեջանը գազ է մատակարարում Թուրքիա՝ հարավային գազային միջանցքով:
Նշվում է նաև, որ Թուրքիայի էներգետիկ զամբյուղում այժմ աստիճանաբար մեծանում է հեղուկացված բնական գազի (LNG) դերը։
Աղբյուր՝ SSBülten
