Ֆինլանդիայի պաշտպանության նախկին նախարար Անտի Կայկոնենը, անդրադառնալով Անկարայի և Հելսինկիի միջև հարաբերությունների դրական դինամիկային, հայտարարել է, որ ՆԱՏՕ-ի երկու դաշնակիցները լավագույն դիրքերում են ռազմարդյունաբերության ոլորտում համագործակցությունն ընդլայնելու համար:
Թուրքիայի պետական «Anadolu» լրատվական գործակալությանը տված հարցազրույցում Կայկոնենը նշել է, որ Թուրքիան հզոր ռազմական կարողություններով և զարգացած ռազմարդյունաբերությամբ օժտված կարևոր դաշնակից է, որն ունի եզակի ռազմավարական դիրք Եվրոպայի, Սև ծովի և Մերձավոր Արևելքի հատման կետում: Նրա խոսքով՝ երկու երկրների միջև ստորագրված ռազմարդյունաբերական համագործակցության փոխըմբռնման հուշագիրը զգալիորեն նպաստում է երկկողմ կապերի ամրապնդմանը:
Անդրադառնալով տարածաշրջանային անվտանգությանը՝ Ֆինլանդիայի նախկին նախարարն ընդգծել է, որ ՆԱՏՕ-ին անդամակցությունից հետո իրենց երկրի պաշտպանական զսպման հնարավորություններն էլ ավելի են մեծացել, և Հելսինկին պատրաստ է Բալթիկ ծովում իրադարձությունների զարգացման ցանկացած սցենարի:
Կայկոնենը մտահոգություն է հայտնել եվրոպական ռազմարդյունաբերության ներկայիս ծավալների վերաբերյալ՝ ընդգծելով, որ Ուկրաինայում ընթացող պատերազմը ի ցույց է դրել զինամթերքի, հակաօդային պաշտպանության, անօդաչու թռչող սարքերի և հրթիռային համակարգերի արտադրության պակասուրդը (դեֆիցիտ):
Աղբյուրը՝ Kıbrıs Türk Haber
