Թուրքիայում Թաիլանդի նորանշանակ դեսպան Չատուրոնտ Չայակամը հայտարարել է ավիացիայի և ռազմարդյունաբերության ոլորտներում Անկարայի հետ համագործակցությունը զարգացնելու մտադրության մասին:
Դեսպանն ընդգծել է «Turkish Airlines»-ի և «Thai Airways»-ի միջև ռազմավարական գործընկերության կարևորությունը՝ նշելով, որ Ստամբուլն ու Բանգկոկը տարածաշրջանային խոշոր ավիացիոն հանգույցներ են: Ըստ նրա՝ կանոնավոր չվերթների ակտիվացումը կնպաստի երկու երկրների միջև զբոսաշրջության և ժողովուրդների շփման զարգացմանը:
Անդրադառնալով ռազմաքաղաքական օրակարգին՝ Չայակամը նշել է, որ ռազմարդյունաբերության ոլորտում համագործակցությունը երկկողմ հարաբերությունների առանցքային ուղղություններից է: Նա հայտնել է, որ նոյեմբերին նախատեսվում է Թաիլանդի ռազմածովային ուժերի բարձրաստիճան պատվիրակության այցը Թուրքիա՝ տեղի արդյունաբերական ձեռնարկություններին ծանոթանալու և համատեղ ծրագրերի շուրջ բանակցելու նպատակով:
Դեսպան Չայակամի խոսքով՝ կողմերը նպատակադրված են 2028 թվականը հայտարարել ռազմավարական գործընկերության տարի: Նա հիշեցրել է նաև «Հարավարևելյան Ասիայի պետությունների ասոցիացիայի» (ASEAN) արտգործնախարարների հանդիպմանը Թուրքիային երկխոսության գործընկերոջ կարգավիճակ շնորհելու որոշման մասին։ Ըստ նրա՝ դա լրացուցիչ ազդակ կդառնա բարձր մակարդակի շփումների ակտիվացման համար:
Աղբյուր՝ Haber.aero
