Ադանայում Խոջալուին նվիրված հուշարձանի կառուցման առաջարկ

Հասարակական08:47, 12 Ապրիլ 2012

Ադանայում Խոջալուին նվիրված հուշարձանի կառուցման առաջարկ

Թուրքական «Բեյազ գազեթե» (Beyaz gazete) լրատվական կայքի տեղեկացմամբ` Ադանա քաղաքի ամենաբանուկ հատվածներից մեկում նախատեսվում է կառուցել Խոջալուի դեպքերին նվիրված հուշարձան:

Ադանա նահանգի նահանգային խորհրդի անդամ Մուստաֆա Հալաչօղլուն օրերս կայացած խորհրդի լիագումար նիստի ժամանակ հանդես է եկել քաղաքում իբր Խոջալուի կոտորածը խորհրդանշող հուշարձան կառուցելու առաջարկով: Նշվում է, որ այդ առաջարկն ընդունվել է խորհրդի մյուս անդամների կողմից:

«Պետք է չթողնենք, որ մեր նոր սերունդը մոռանա այդ դեպքերը: Թուրքիայի ամեն մի նահանգում մենք պետք է կառուցենք Խոջալուին և 1915-ին կոտորածի ենթարկված թուրքերին նվիրված հուշակոթողներ: Դրանք մեր պատմական հիշողության կենդանի վկաները կլինեն: Թշնամություն չսերմանող, բայց պատմական իրադարձությունների մասին հիշեցնող հուշարձաններ պետք է լինեն»,- ասել է Հալաչօղլուն:

Հիշեցնենք, որ 1992թ. փետրվարի 25-26-ը Լեռնային Ղարաբաղի Հանրապետության ինքնապաշտպանության զորքերը կազմակերպեցին ռազմական գործողություն՝ Խոջալու բնակավայրի մերձակայքում գտնվող ԼՂՀ-ում միակ օդանավակայանն ապաշրջափակելու և հենց Խոջալուում տեղակայված հակառակորդի կրակակետերը վնասազերծելու նպատակով, որոնք «Գրադ» կայանքներից գնդակոծում էին իրենց հասանելիության գոտում գտնվող կենդանի ամեն ինչ։

ԼՂՀ ինքնապաշտպանության ուժերի՝ Խոջալուն գրոհող ստորաբաժանումները բնակավայրի խաղաղ բնակիչներին մարտական գործողությունների գոտուց անվտանգ հեռանալու միջանցք տրամադրեցին, որի մասին ադրբեջանական կողմին նախապես զգուշացվել էր։ Բայց Ադրբեջանի իշխանությունները ոչինչ չձեռնարկեցին խաղաղ բնակչությանը մարտական գործողությունների գոտուց դուրս բերելու համար։ Ավելին, խաղաղ բնակիչների շարասյունը գնդակոծվեց ադրբեջանական զինված ուժերի կողմից վերահսկվող տարածքում։