Կարապետ Բալըքչը. Ապրիլի 24-ն էր, պետք է այդ օրը հայ մեռներ

Հասարակական12:38, 22 Հունվար 2013

Կարապետ Բալըքչը. Ապրիլի 24-ն էր, պետք է այդ օրը հայ մեռներ

Թուրքական «Թարաֆ» (Taraf) թերթի թղթակիցը զրուցել է 2011թ ապրիլի 24-ին սպանված թուրքական բանակի ժամկետային զինծառայող ազգությամբ հայ Սևակ Շահին Բալըքչըի ծնողների հետ: Նրանք նշել են, որ իրենց որդու մահը դժբախտ պատահարի հետևանք չէր: Իսկ սպանության համար ընտրված ապրիլի 24-ը ևս պատահականություն լինել չէր կարող: Մայրը պատմել է, որ դատավարության ընթացում մի քանի վկա իրենց ցուցմունքներում նախ նշել են, որ Սևակի մահը դժբախտ պատահար չէ, ապա փոխել են իրենց տված ցուցմունքները, քանի, որ նրանց վախեցրել են: Իսկ Սևակի հայրը` Կարապետ Բալըքչըն մասնավորապես նշել է.

«Հաստատ դա դժբախտ պատահար չէր: Դա ապրիլի 24-ն էր, զատիկի օրն էր: Այդ օրն անհրաժեշտ էր, որ մի հայ մեռներ: Սրան ես ամբողջ սրտով հավատում եմ: Հնարավոր է, որ անձամբ հենց Սևակի մահը պատվիրված էր: Հնարավոր է, որ մարդասպանին ուղղակի ասել էին` «այսօր մի հայ սպանիր» : Այս առումով Սևակը հարմար թեկնածու էր:»,-պատմում է հայրը:

Լրագրողի «վերջին օրերին հայերի վրա հաճախ են հարձակումներ լինում, հատկապես Սամաթիայում , դա ձեզ չի՞ անհանգստացնում» հարցին ի պատասխան Սևակի մայրն ասել է. «Իհարկե դա տագնապեցնող է, երբ տեսնում ենք, որ այլատյացությունը նոր թափ է առնում: Մեզ ասացին «կամ սիրեք, կամ լքեք»: Մենք սիրեցինք և հիմա մեռնում ենք: Ամենաշատը մեր երիտասարդների համար ենք վախենում»:

Հիշեցնենք, որ Բաթման նահանգի Քոզլուքի շրջանում տեղակայված ժանդարմերիական զորամասում 2011-ի ապրիլի 24-ին պոլսահայ Սևակ Շահինին հրազենից արձակված կրակոցով սպանել էր ծառայակից Քվանչ Աղաօղլուն: Պաշտոնական վարկածի համաձայն` սպանությունը տեղի է ունեցել ծառայակից ընկերոջ հետ կատակ անելու ժամանակ, իբր պատահաբար արձակված կրակոցից: Սևակի սպանության գործով հերթական դատալսումը տեղի կունենա հունվարի 25-ին: