Օզալի կինը ստացել է «Օզալին սպանել են, մարդասպանն Ադրբեջանում է» գրությամբ նամակ

Հասարակական13:00, 19 Ապրիլ 2013

Օզալի կինը ստացել է «Օզալին սպանել են, մարդասպանն Ադրբեջանում է» գրությամբ նամակ

Թուրքիայի Հանրապետության 8-րդ նախագահ Թուրքութ Օզալի` կասկածելի հանգամանքներում տեղի ունեցած մահվան թեմայով նոր զարգացումներ են նկատվում, որոնց հետքերը տանում են Ադրբեջան:

Օզալի այրին` Սեմրա Օզալը, դատախազին ներկայացրել է 15 տարի առաջ անհայտ անձից ստացած մի նամակ: Թուրքական «NTV» հեռուստաալիքի տեղեկացմամբ` Սեմրա Օզալը պատմել է, որ ամուսնու սպանությունից 5 տարի հետո Ստամբուլի իրենց բնակարան է եկել անհայտ մեկը և ցանկություն հայտնել տեսակցել իրեն: Երբ հաղորդել են, որ տիկինը տանը չէ, նա պահակախմբին հանձնել է մի նամակ և խնդրել է այն անպայման փոխանցել Սեմրա Օզալին: Իսկ նամակում եղել է հետևյալ գրությունը. «Թուրգութ Օզալին սպանել են: Մարդասպանն Ադրբեջանն է: Անունն էլ` Հասան Ալիօղլու»:

Դրանից հետո գործողություններ են ձեռնարկվել կասկածյալին գտնելու նպատակով, բայց այդպես էլ չի հաջողվել նման անուն ազգանունով ադրբեջանաբնակ մարդ հայտնաբերել:

Օզալի կինն իր ցուցմունքում հանգամանորեն նկարագրել է ամուսնու վերջին րոպեների դրվագները: Այն` ստորև:

«Առավոտյան արթնացանք: Նա լոգանք ընդունեց և սափրվեց: Ես նախաճաշն էի պատրաստում: Հետո գնացինք, որ միասին նախաճաշենք: Մարզագույքի մոտով անցնելիս` ամուսինս ասաց. «Այսօր չեմ մարզվի, որ լոգանքից հետո չքրտնեմ»: Այնուհետև ձայն լսեցի թիկունքումս, շրջվեցի և ի°նչ տեսնեմ. նա բերանքսիվայր գետնին էր ընկել ու բերանից սպիտակ հեղուկ էր թափվում: Բժիշկներին օգնության բղավեցի: Նրան տարան հիվանդանոց, որտեղ էլ և մահացավ»:

Հիշեցնենք, որ Թուրքգութ Օզալը մահացել է 1993 թվականին ապրիլի 17-ին, պաշտոնական վարկածի համաձայն` սրտի կաթվածից: Բայց տեսակետ կա, որ նրան թունավորել են: Ժամանակին նույնիսկ կատարվել է Օզալի աճյունի արտաշիրիմում: Դատաբժշկական փորձաքննության արդյունքում պարզվեց, որ Օզալի օրգանիզմում հայտնաբերվել է թույն, բայց ոչ այն քանակությամբ, որը կարող էր մահվան հասցնել: Մահվանից երկու օր Օզալը գտնվել էր Ադրբեջանում:

Ermenihaber.am