ERMENI HABER AJANSI

Թուրքիայի զինված ուժերի (ԶՈւ) մասին օրենքում փոփոխություն կատարելու առաջարկ է ներկայացվել խորհրդարան: Այս մասին հայտնել է Թուրքայի փոխվարչապետ Բեքիր Բոզդաղն ուսանողների հետ հանդիպման ժամանակ:

Թուրքիայի զինուժի մասին օրենքի 35-րդ հոդվածը մինչև օրս ներկայացվել է որպես հեղաշրջումների համար հիմք ծառայող իրավական ակտ: Նոր օրինագծով առաջարկվում է իսպառ հանել է Թուրքիայի զինված ուժերի հետ կապված հեղաշրջման մոտիվացիան:

Այսպես` 1961 թվականին գործողության մեջ մտած  35-րդ հոդվածում այժմ նշված է հետևյալը. «Զինված ուժերի պարտքն է պահպանել և պաշտպանել թուրքական հայրենիքը` Սահմանադրությամբ ամրագրված Թուրքիայի Հանրապետությունը»:

Այժմ առաջարկվում է հոդվածը վերաշարադրել հետևյալ կերպ. «Զինված ուժերի պարտքն է արտերկրից եկող վտանգների և սպառնալիքներից պաշտպանել թուրքական հայրենիքը,  կանխարգելիչ ձևով ուժեղացնել պաշտպանությունը և նպաստել միջազգային խաղաղության ապահովմանը»:

Բացի դրանից առաջարկվում է փոփոխության ենթարկել նաև նույն օրենքի 43-րդ հոդվածը, որը թույլ չի տա Թուրքիայի զինված ուժերին զբաղվել քաղաքականությամբ:

Հիշեցնենք, որ Թուրքիայի ԶՈւ Գլխավոր շտաբի հրապարակած տվյալների համաձայն` թուրքական բանակի ընդհանուր զորակազմի թիվը 687.617 է: Այս զինծառայողներից 481.603-ը ծառայում է ցամաքային, ռազմաօդային և ռազմածովային ուժերում, 191.684-ը կազմում է ժանդարմերիան, իսկ 5.330-ն էլ` առափնա պարեկային զորախումբը: Այժմ Թուրքիայի զինուժում ծառայում է 347 գեներալ և ծովակալ:

Ermenihaber.am