Հյուսիսային Կիպրոսի Թուրքական Հանրապետության կառավարությունը հրաժարական է տվել

Միջազգային07:01, 03 Օգոստոս 2013

Հյուսիսային Կիպրոսի Թուրքական Հանրապետության կառավարությունը հրաժարական է տվել

Ինչպես հայտնում է «CNNTurk» լրատվական ծառայությունը, Հյուսիսային Կիպրոսի Թուրքական Հանրապետության (ՀԿԹՀ) վարչապետ տկն Սիբել Սիբերը նախագահ Դերվիշ Էրօղլուին ներկայացրել է կառավարության հրաժարականը: Այն բանից հետո, երբ հուլիս 28-ին կենտրոնական ընտրական հանձնաժողովը հրապարակեց վաղաժամ անցկացված խորհրդարանական ընտրությունների արդյունքները, երկրի գործադիր իշխանությունը նախապատրաստեց իր հրաժարականը:

Նախագահ Էրօղլուն մինչև նոր կառավարության ձևավորումը Սիբերին հանձնարարել է շարունակել պաշտոնավարությունը: Իսկ նորընտիր խորհրդարանի առաջին նիստը գումարվելու է օգոստոսի 12-ին, որի ժամանակ օրենսդիրի երդման արարողությունն է տեղի ունենալու: Այնուհետև նախագահ Էրօղլուն պատգամավորներից մեկին հանձնարարելու է 15-օրյա ժամկետում ձևավորել կառավարություն:

Նշենք, որ Կիպրոսի բնակչության մեծամասնությունը` գրեթե 80 տոկոսը, հույներ են, որոնց նախնիներն այստեղ բնակություն են հաստատել ավելի քան 3.000 տարի առաջ, 18 տոկոսը թուրքեր են, որոնք այստեղ հաստատվել են 16-րդ դարից սկսած: Իսկ 1974-ին թուրքիական բանակը պարզապես նվաճեց Կիպրոսի հյուսիսարևելյան մասը և այնտեղ հռչակեց այսպես կոչված Հյուսիսային Կիպրոսի Թուրքական Հանրապետություն, որը ճանաչված է միայն Թուրքիայի կողմից: ՀԹԿՀ-ն դեսպանատուն ունի Թուրքիայում և դիվանագիտական ներկայացուցչություններ 9 երկրում, այդ թվում՝ Ադրբեջանում, Մեծ Բրիտանիայում, Իտալիայում։ ՀԹԿՀ-ն զբաղեցնում է Կիպրոս կղզու մեկ երրորդը, մայրաքաղաքը Նիկոսիան է: Կիպրոսի Հանրապետությունից անջատող բաժանման գիծը համարվում է բուֆերային գոտի և պաշտպանվում են ՄԱԿ-ի խաղաղապահ ուժերի կողմից։

Ermenihaber.am