Գերմանիայի իշխող կուսակցությունը դեմ է Թուրքիայի ԵՄ անդամակցությանը

Միջազգային12:48, 04 Փետրվար 2014

Գերմանիայի իշխող կուսակցությունը դեմ է Թուրքիայի ԵՄ անդամակցությանը

Գերմանիայի իշխող «Քրիստոնեադեմոկրատական միություն» կուսակցությունը դեմ է արտահայտվել Թուրքիայի Եվրամիության (ԵՄ)անդամակցությանը:

Թուրքական «Ջիհան» լրատվական գործակալությունը հայտնում է, որ նման հայտարարություններ կատարվել են Թուրքիայի վարչապետ Ռեջեփ Թայիփ Էրդողանի` Գերմանիա կատարած այցելության նախօրեին:

Թուրքական աղբյուրը մեկտեղել է Թուրքիայի ԵՄ անդամակցության վերաբերյալ Գերմանիայում հնչեցված հայտարարությունները:

Նշվում է, որ շաբաթվա վերջում քննարկման է դրվելու Գերմանիայի կանցլեր Անգելա Մերկելի «Քրիստոնեադեմոկրատական միություն» կուսակցության ծրագիրը, որի նախնական տարբերակը դեմ է Թուրքիայի ԵՄ անդամակցությանը: Ծրագրում նույնիսկ ներառված չեն Թուրքիայի, որպես ԵՄ «արտոնյալ գործընկեր» դառնալու մասին Մերկելի կուսակցության հայտարարությունները:

Գերմանիայի արտգործնախարար Ֆրանկ Ուլթեր Սթեյնմեյերը հայտնել է, որ նախատեսում է թուրք գործընկերների հետ լուրջ քննարկումներ անցկացնել՝ կապված իրավական պետությանը, արդարադատությանը և մարդու իրավունքներին վերաբերող փաթեթների քննարկման հետ:

Իշխանական «Սոցիալ-դեմոկրատական» կուսակցության խորհրդարանական խմբակցության փոխնախագահ Ռոլֆ Մյութզենիխն էլ անդրադարձել է Թուրքիայում տեղի ունեցած կոռուպցիոն և կաշառակերության աղմկահարույց դեպքերի բացահայտմանը: Գերմանացի գործիչը նշել է, որ կոռուպցիոն հետաքննությունը վարող դատախազների հարցում Էրդողանի դիրքորոշումը անընդունելի է և իրավական պետության չափանիշների հետ անհամատեղելի է:

Ընդդիմադիր «Կանաչների» կուսակցության խորհրդարանական խմբացկության ղեկավար Մանուել Սառազին Մերկելին կոչ է արել հստակեցնել այս հարցում Գերմանիայի դիրքորոշումը:

Ermenihaber.am