Ամերիկացի լրագրողը Թուրքիային մեղադրում է Սիրիայում քիմիական հարձակում կազմակերպելու մեջ

Միջազգային07:52, 10 Ապրիլ 2014

Ամերիկացի լրագրողը Թուրքիային մեղադրում է Սիրիայում քիմիական հարձակում կազմակերպելու մեջ

Պաշտոնական Անկարային հաճախակի քննադատության թիրախ դարձնող ԱՄՆ հայտնի լրագրող, Պուլիցերյան մրցանակակիր Սեյմուր Հերշը համոզմունք է հայտնել, որ Սիրիայում քիմիական զենքի կիրառման մեջ մասնակցություն ունի Թուրքիայի իշխող «Արդարություն և զարգացում» կուսակցությունը (ԱԶԿ): Հերշը, վկայակոչելով ԱՄՆ հետախուզության զեկույցի տվյալները, պնդում է, որ 2013-ին Սիրիայում իրականացված քիմիական հարձակումը ծրագրվել է Թուրքիայի հատուկ ծառայությունների կողմից, ավելի ստույգ` «Ազգային հետախուզական կազմակերպության» (MİT) կողմից:

«Թուրք ժանդարմները քիմիական զենքի հումքը բեռնատարներով տեղափոխել են Սիրիա, մասնավորապես` Հալեպ: Այնուհետև իրականացվել է քիմիական զենք ստանալու համար նյութերի սինթեզը, որից հետո էլ և գործադրվել է»,- ըստ թուրքական «Ջումհուրիյեթ» լրատվականի` ասել է ամերիկացի լրագրողը:

Հիշեցնենք, որ 2013-ի օգոստոսի 21-ին Դամասկոսի արվարձանների վրա տեղի էր ունեցել քիմիական զենքի կիրառմամբ հարձակում: Ընդդիմադիր ուժերը դրանում մեղադրում էին կառավարական զորքերին, վերջիններս էլ` ընդդիմադիրներին: Զոհերի թիվը տարբեր աղբյուրներով նշվում էր 600-ից մինչև 1300 մարդ:

Ermenihaber.am