ERMENI HABER AJANSI

Թուրքիայի նախագահ Աբդուլլահ Գյուլի` նախօրեին արած հայտարարությունն այն մասին, որ ներկա դրությամբ ինքը չունի քաղաքական ծրագրեր, իրարանցում է առաջացրել: Թուրքական «Ռադիքալ» պարբերականի սյունակագիր Օմեր Շահինը Անկարայի կուլիսներում մշակվող սցենարներին է անդրադարձել:

Գյուլը չի առարկում, որ Էրդողանն առաջադրվի նախագահի թեկնածու: Թուրքիան գնում է դեպի նախագահական ընտրություններ, բայց ճգնաժամը վարչապետի հարցի հետ է կապված: Հոդվածագիրը ուշադրություն է հրավիրում այն հանգամանքի վրա, որ Էրդողանը հանրապետության նախագահ ընտրվելուց հետո հնարավոր է կառուցվածքային փոփոխության ենթարկի իշխող «Արդարություն և զարգացում» կուսակցությունը (ԱԶԿ-AKP): Էրդողանը կցանկանա որպես երկիրը ղեկավարող կուսակցական նախագահ թեկուզ համանախագահություն ունենալ ԱԶԿ-ում: Իսկ ահա ազդեցիկության այդպիսի լծակներ ունեցող նախագահի հետ էլ որպես վարչապետ աշխատելը Գյուլի համար ընդունելի տարբերակ չէ:

Գյուլի սցենարը հետևյալն է, եթե մրցակցության անհրաժեշտություն լինի, ջանք գործադրել և կարողանալ ստանձնել կուսակցության նախագահությունը: Իսկ ընտրություններից հետո վարչապետ դառնալուց հետո ամբողջապես օգտագործել կառավարության ղեկավարի լիազորությունները: Այսինքն Գյուլը լիովին կողմնակից է խորհրդարանական համակարգի վարչապետի և կուսակցության ղեկավարի պես գործելուն: Ասել է թե` Էրդողանի ճանապարհային քարտեզը և կազմած մոդելը չեն համապատասխանում Գյուլի պատկերացումներին: Հեղինակի համոզմամբ` Գյուլի հայտարարությունն այն մասին, թե ներկա պահին քաղաքական ծրագրեր չունի, չի նշանակում, որ հեռանում է քաղաքականությունից, ընդհակառակը, դա նոր սկիզբ է նշանակում:

Իսկ որպես ամենածայրահեղ սցենար Շահինը համարում է նոր կուսակցության հիմնումը Գյուլի կողմից: Դա կլինի այն դեպքում, երբ Գյուլի ու Էրդողանի միջև ընդհանուր փոխհամաձայնություն չկայանա: Այդժամ, ըստ վերլուծաբանի, ԱԶԿ-ին բուռն օրեր են սպասվում: Էրդողանը վարչապետի աթոռը հանձնելու համար արժանի թեկնածուներ կդիտի Բյուլենթ Արընչին, Ահմեթ Դավութօղլուին, Մեհմեթ Ալի Շահինին, Ալի Բաբաջանին, Բինալի Յըլդըրըմին: Շատերի կարծիքով` կգա ժամանակ, որ Էրդողանի ու Գյուլի ճամփաները կբաժանվեն` չնայած նրանց 40 տարվա մտերմությանը: Նույնիսկ այն դեպքում, երբ Էրդողանը հետևի «առանց Գյուլի «ԱԶԿ» մոդելին», դա դեռ չի նշանակում, թե Գյուլը դուրս է մղվում քաղաքականությունից:

«Աբդուլլահ Գյուլը եթե հարկ լինի «ԱԶԿ»-ի ներսից ստացած աջակցությամբ նոր կուսակցություն կստեղծի»,- եզրակացնում է հոդվածի հեղինակը:

Հիշեցնենք, որ  2014-ի օգոստոսի 10-ին Թուրքիայում անցկացվելու են 12-րդ նախագահական ընտրությունները:

Ermenihaber.am