ERMENI HABER AJANSI

Թուրքիայի վարչապետ Ռեջեփ Թայիփ էրդողանը հունիսի 12 կմեկնի Վիեննա, որտեղ ելույթ կունենա «Եվրոպացի թուրք դեմոկրատների միության» 10 ամյակի առթիվ:
Ինչպես տեղեկացնում է թուրքական «Ջիհան» լրատվական կայքը, ավստրիական հայտնի պարբերականները անդրադարձել են վարչապետի սպասվող այցին:

Մասնավորապես «Die Presse» թերթում  հրապարակվել է «Ավստրիան Թուրքիայի 82-րդ նահանգը չէ» հոդվածը:  Հեղինակը գրել է, որ վարչապետ Էրդողանը, չնայած Թուրքիայում խոսքի ազատության սահմանափակմանը, Ավստիրիայում ազատորեն կարող է օգտվել «Twitter»-ից ve «Youtube»-ից:

«Kurier» թերթը «Մենք վատ մուսուլմաններ չենք» վերնագրով նյութ է հրապարակել, որտեղ տեղ են գտել հիմնականում Էրդողանի կողմնակիցների, այդ թվում Վիեննայում ճանաչված բժիշկ Թուրգայ Թաշքըրանի կարծիքները: Վերջինս ընդգծել է, որ Էրդողանին պետք է որպես հյուր ընդունել:

Էրդողանի Վիեննա կատարելիք այցը երկար ժամանակ է գտնվում է մամուլի ուշադրության կենտրոնում:
Բանն այն է,  որ Թուրքիայում մեծ արձագանք էր գտել Ավստրիայի 28-ամյա արտգործնախարար Սեբաստիան Քուրզի հարցազրույցը, որտեղ զգուշացրել էր Էրդողանին՝ նշելով, որ նա չի կարող պառակտել Ավստրիայի հասարակությունը:

«Ինտեգրացիան շատ նուրբ հարց է: Սխալ մի խոսքը մեզ հետ կմղի, միջավայրըկթունավորի: Էրդողանը պարտավոր է  այստեղ ապրող թուրքերին ասել, որ գերմաներեն սովորեն և հավատարիմ լինեն Ավստրիային: Սակայն, եթե խոսի  այնպես, ինչպես Գերմանիայում, ապա դա կլինի ի վնաս թուրքերի»,- հայտնել էր արտգործնախարարը:

Ավստրիացի նախարարի հայտարարությանն ի պատասխան «Cyber-Warrior Akıncılar» անունով թուրք հաքերները կոտրել էին նրա կայքը՝ տեղադրելով Սուլեյման Առաջին սուլթանի ու Էրդողանի նկարը և թողնելով հետևյալ գրությունը. «Ո՞վ ես դու, փոքրի՛կ: Դու չես կարող որոշել, թե մեր վարչապետը ինչպես խոսի: Վարչապետ Էրդողանը  այն մարդու թոռն է, ով հասել է  մինչև Վիեննա, մինչև այն տարածքները, որտեղ հիմա ապրում եք դուք»:

Ermenihaber.am