Գերմանահայությունը մերժել է հայկական եկեղեցի այցելելու Քըլըչդարօղլուի ցանկությունը

Միջազգային08:24, 30 Հունիս 2014

Գերմանահայությունը մերժել է հայկական եկեղեցի այցելելու Քըլըչդարօղլուի ցանկությունը

Այցով Գերմանիայի Քյոլն քաղաքում գտնվող Թուրքիայի ընդդիմադիր «Ժողովրդահանրապետական կուսակցության» (ԺՀԿ -CHP) նախագահ Քեմալ Քըլըչդարօղլուն այցելել է հունական և ասորական եկեղեցիներ: Քըլըչդարօղլուի Գերմանիա կատարած այցի նպատակը եվրոպաբնակ թուրքերին Թուրքիայի նախագահի պաշտոնում ընդդիմության առաջադրած միասնական թեկնածուի` Էքմելեդդին Իհսանօղլուի հետ ծանոթացնելն էր:

Թուրք ընդդիմադիր գործիչը ցանկություն է հայտնել հանդիպել նաև Գերմանիայի հայկական համայնքի հետ, սակայն Գերմանիայի հայ հոգևոր առաջնորդարանի կողմից մերժում է ստացել:

Առաջնորդարանի ներկայացուցիչը պարզաբանում է տվել, որ մամուլում և սոցցանցերում հայտնված տեղեկություններն այն մասին, թե Քըլըչդարօղլուն այցելել է Գերմանիայի հայկական եկեղեցի, իրականությանը չեն համապատասխանում:

«Հայ հոգևոր առաջնորդարանը մերժել է, որ Քըլըչդարօղլուն այցելի հայկական եկեղեցի: Քանի դեռ Քըլըչդարօղլուն և «Ժողովրդահանրապետական» կուսակցության ղեկավարությունը ժխտում են Հայոց ցեղասպանությունը, անհնար է նրանց այստեղ ընդունել»,- ըստ թուրքական «դեմոկրատ հաբեր» լրատվականի` մերժման պատճառը հստակեցրել է առաջնորդարանի ներկայացուցիչը:

Ermenihaber.am