ERMENI HABER AJANSI

Թուրքիայի խորհրդարանում ներկայացված «Ժողովուրդների դեմոկրատական» կուսակցությունը (ԺԴԿ-HDP) հրավիրել է մամուլի ասուլիս և հրապարակել առաջիկա նախագահական ընտրություններում իրենց առաջադրվելիք թեկնածուի անունը:

Ըստ թուրքական «Դողա» լրատվական գործակալության` կուսակցությունը հանրապետության նախագահի պաշտոնին առաջադրում է Սելահաթթին Դեմիրթաշի թեկնածությունը, որը «ԺԴԿ»-ի համանախագահներից է:

Թեկնածուն իր խոսքում նշել է, որ իրենց համար գլխավորը ժողովրդավարությունն է, ազատությունը և խաղաղությունը: Հավաստացրել է, որ իրենք ժողովրդի մեջ են մնալու և ժողովրդի հետ:

«Նախագահի թեկնածուների մեջ միակ թերությունը կին թեկնածուի բացակայությունն է»,- նշել է Դեմիրթաշը:

Վերջինս ծնվել է 1973 թվականին Էլազըղում: Դեմիթաշը ծագումով զազա քուրդ է: Ստացել է իրավաբանի կրթություն, ավարտել է Անկարայի համալսարանի իրավաբանական ֆակուլտետը: Աաշխատել է մարդու իրավունքների գրասենյակում, զբաղվել նաև փաստաբանությամբ: Թուրքիայի 23-րդ գումարման խորհրդարանում ընտրվել է պատգամավոր Դիարբեքիրից: Տիրապետում է զազայերեն, քրդերեն և անգլերեն լեզուներին: Ամուսնացած է, երկու զավակի հայր է:

Հիշեցնենք, որ օգոստոսի 10-ին Թուրքիայում կայանալու են նախագահական ընտրություններ: Առաջին անգամ երկրի նախագահին կընտրի ոչ թե խորհրդարանը, այլ` ժողովուրդը: Ընդդիմությունն արդեն ներկայացրել է իր միասնական թեկանծուին` Էքմելեդդին Իհսանօղլուին, որը նախկինում ղեկավարել է «Իսլամական կոնֆերանս» հայտնի կազմակերպությունը: Իշխող «Արդարություն և զարգացում» կուսակցությունը (ԱԶԿ-AKP) իր թեկնածուի անունը հրապարակելու է հուլիսի 1-ին: Ըստ ամենայնի` իշխանության թեկնածուն լինելու է գործող վարչապետ Ռեջեփ Թայիփ Էրդողանը:

Ermenihaber.am