Հունաստանի խորհրդարանը մասամբ քննարկել է Ցեղասպանությունների հերքում քրեականացնող օրինագիծը

Իրավական08:12, 06 Սեպտեմբեր 2014

Հունաստանի խորհրդարանը մասամբ քննարկել է Ցեղասպանությունների հերքում քրեականացնող օրինագիծը

Հունաստանի խորհրդարանում երեկ քննարկման էր դրվել այլատյացության դեմ պայքարի օրինագիծը, որը պատիժ է սահմանում նաև Հայոց ցեղասպանությունը հերքողների նկատմամբ:

Թուրքական «Հաբերլեր» լրատվական կայքի տեղեկացմամբ՝ հույն պատգամավորները հաստատել են 6 կետից բաղկացած օրինագծի 3 կետը, իսկ մյուս 3-ի քվեարկությունը հետաձգել են: 1-ին, 2-րդ և 3-րդ կետերը, որոնք նախատեսում են միջազգային դատարանների և Հունաստանի խորհրդարանի կողմից ճանաչված ցեղասպանությունները, պատերազմական և մարդկության դեմ իրագործված հանցագործությունները դիտավորյալ ժխտողների նկատմամբ դրամական պատիժ և ազատազրկում սահմանել, քվեարկության կդրվեն հաջորդ երեքշաբթի՝ սեպտեմբերի 9-ին:

Հունաստանի խորհրդարանի 3 ընդդիմադիր կուսակցությունը դեմ են արտահայտվում օրինագծին՝ պատճառաբանելով, որ այն սահմանափակում է խոսքի ազատությունը և իրականում այլատյացության դեպքերի դեմ կանխարգելիչ մեխանիզմների չի պարունակում:

Մարդկության դեմ հանցագործությունները, այդ թվում և Հայոց ցեղասպանության ժխտումը քրեականացնող օրինագիծը քննարկվել է նաև Թուրքիայի նախագահ Ռեջեփ Թայիփ Էրդողանի և Հունաստանի վարչապետ Անտոնիս Սամարասի հանդիպման ժամանակ: Նրանց հանդիպումը տեղի է ունեցել երեկ Ուելսում անցկացվող ՆԱՏՕ-ի գագաթնաժողովի շրջանակներում:

Էրդողանը Հունաստանի վարչապետին զգուշացրել է, որ այդ օրինագիծը թուրք-հունական հարաբերություններում խնդիրների պատճառ կդառնա: Հունական կողմն էլ ընդգծել է, որ օրինագիծը համապատասխանում է միջազգային իրավունքին և Եվրոպայում ընդունված որոշումներին: Ըստ հունական կողմի՝ օրենքը պատրաստվել է ի նշան զոհվածների հիշատակի հանդեպ հարգանքի և որևէ կերպ չի առնչվում ժամանակակից Թուրքիայի հետ հարաբերություններին:

Ermenihaber.am