Կեղծ թուրքական անձնագրերով չինաստանցի գրոհայինները՝ ԻՊ-ի ճամբարներում

Միջազգային13:36, 23 Սեպտեմբեր 2014

Կեղծ թուրքական անձնագրերով չինաստանցի գրոհայինները՝ ԻՊ-ի ճամբարներում

Չինական Խինջիանգ նահանգի լրատվամիջոցներում հայտնվել է տեղեկություն այն մասին, որ չինացի գրոհայինները փախչում են Թաիլանդ, այնտեղ ձեռք են բերում կեղծ թուրքական անձնագրեր և Ինդոնեզիայում գտնվոող Իրաքի ու Լևանտի իսլամական պետության (ներկայում՝ Իսլամական պետություն-ԻՊ ) ճամբարներում ահաբեկչական գործողություններ կատարելու համար հատուկ պատրաստություն անցնում:

Թուրքական «Դողան» լրատվական գործակալության հաղորդմամբ՝ «Global Times» թերթի հետ հարցազրույցում անունը հրապարակել չցանկացող ահաբեկչության դեմ պայքարի մի աշխատակից տեղեկացրել է, որ ահաբեկչական գործողությունների կազմակերպման տեխնիկան յուրացնելուց բացի գրոհայինները կապ են հաստատում նաև աշխարհի այլ ահաբեկչական կազմակերպությունների հետ: Աղբյուրի հաղորդմամբ՝ վերջին ժամանակներում հատուկ դասընթացներ անցած ահաբեկիչներն արդեն Իրաքում և Սիրիայում հնարավորություն են ունեցել գործնականում օգնել ԻՊ-ին: Հաղորդվում է, որ ընթացիկ ամսում Ինդոնեզիայում արդեն 4 մարդ է ձերբակալվել, ովքեր Չինաստանից անցել են Կամբոջա, այնուհետև՝ Թաիլանդ: Այստեղից էլ, ձեռք բերելով կեղծ թուրքական անձնագրեր, անցել են Ինդոնեզիա:

Ըստ աղբյուրի՝ չինական կառավարությունն հայտարարել է, որ ույգուր թուրքերի մասնակցությունը ահաբեկչական գործողություններին զգալիորեն աճել է, ինչի իրական նպատակը անկախ «Արևելյան Թուրքիա» հիմնելու ույգուրների ցանկությունն է: