ERMENI HABER AJANSI

Մի քանի օր շարունակ խոսակցություններ էին շրջանառվում, թե Թուրքիայում իրավապահները պետք է ձերբակալեն մի շարք քաղաքացիների, որոնց շարքերում կլինեն նաև լրագրողներ: Եվ ահա դեկտեմբերի 14-ի վաղ առավոտյան ոստիկանությունը միաժամանակյա օպերացիա է իրականացրել երկրի 13 նահանգներում և բերման ենթարկել ավելի քան 3 տասնյակ մարդու: Ստամբուլի գլխավոր դատախազ Հադի Սալիհօղլուն 31 կասկածյալի ձերբակալության մասին որոշում է ընդունել: Հրապարակվել է ձերբակալվածների անվանացանկը,  որոնց մեջ կա նաև հայտնի «Զաման» ընդդիմադիր պարբերականի խմբագրական խորհրդի ղեկավար Էքրեմ Դումանլըն, ինչպես նաև մոտ երկու տասնյակ լրագրողներ: Ձերբակալվածները մեղադրվում են «Իշխանությունը զավթելու, զինված ահաբեկչական կազմակերպություն հիմնելու, ղեկավարելու, անդամակցելու, խարդախություն և զրպարտություն անելու մասին» հոդվածի հատկանիշներով:

Թուրքական «T24» լրատվակայքի տեղեկացմամբ` ոստիկանությունն այդ արշավն իրականում սկսել է նախագահ Ռեջեփ Թայիփ Էրդողանի վարչակազմի հետ առճակատման մեջ գտնվող գյուլենական համայնքի գաղափարները կիսող լրատվամիջոցների դեմ: Տեսակետ կա, որ նման կերպ թուրքական իշխանությունները փորձում են լռեցնել գյուլենականներին:

Լրագրողների զանգվածային ձերբակալությունը Թուրքիայի հասարակական և մտավորական շրջանակներում առաջացրել է մեծ վրդովմունք ու դժգոհություն, որը դրսևորվել է սոցմեդիայում: Հանրաճանաչ բազմաթիվ գործիչներ Twitter միկրոբլոգի միջոցով իրենց դատապարտող խոսքերն են հասցեագրել իշխանություններին: Մասնավորապես թուրք գրող, լրագրող Հասան Ջեմալը Twitter-ում գրել է, որ Էրդողանը կրակի հետ է խաղ անում, չի կարողանալու ճզմել մարդկանց ազատությունները: «Ռադիքալ» պարբերականի սյունակագիր Ջենգիզ Չանդարը իր զորակցությունն է հայտնել ձերբակլաված լրագրողներին և թուրքական իշխանությունների արարքն անվանել դեպի բռնապետություն տանող անխոհեմություն: «Ջումհուրիյեթ» թերթի հրապարակումների համակարգող Մուրադ Սաբունջուն էլ հանդես է եկել հայտարարությամբ, որ Թուրքիայում լրագրության վրա բանեցվող ճնշումների ու բռնությունների դեմ պայքարի դուրս գալն առնվազն պատվի հարց է:

Ermenihaber.am