ERMENI HABER AJANSI

Միջազգային մամուլն անդրադարձել է դեկտեմբերի 14-ին Թուրքիայում ոստիկանության անցկացրած գործողություններին, որի ժամանակ ձերբակալվել են 2 տասնյակից ավելի  թուրք լրագրողներ:

Արտասահմանյան լրատվամիջոցներն այս գործողությունները հիմնականում որակում են որպես  հարձակում ԱՄՆ-ում բնակվող իսլամական գործիչ, իր իսկ կողմից ստեղծված իսլամական շարժման ղեկավար ազգությամբ թուրք Ֆեթուլլահ Գյուլենին մոտ կանգնած ԶԼՄ-ների վրա: Մասնավորապես Reuters-ը գրում է, որ  ոստիկանական գործողությունները կատարվել են այն բանից հետո, երբ Թուրքիայի նախագահ Ռեջեփ Թայիփ Էրդողանը ակնարկ էր արել  Գյուլենի աջակիցների նկատմամբ նոր  օպերացիա իրականացնելու մասին:

BBC-ն նույնպես կարծում է որ Թուրքիայի ոստիկանության գործողություններն ուղղված են եղել գյուլենամետ ընդդիմադիր լրատվամիջոցների դեմ:
Իսկ գերմանական «Deutsche Welle» թերթը  դեկտեմբերի 14-ի գործողությունները որակել է որպես  հարձակում «մամուլի ազատության վրա»:

Թուրքական «Յենիշաֆաք» թերթի ներկայացմամբ՝ վերոնշյալ լրատվամիջոցները կամ Թուրքիայի կամ նախագահ Էրդողանի դեմ են հանդես գալիս և աջակցում են «զուգահեռ կառույցին»: Վերջինը թուրքական լրատվամիջոցներում նույնականացվում է գյուլենական համայնքի հետ:

Հիշեցնենք, որ դեկտեմբերի 14-ի վաղ առավոտյան ոստիկանությունը միաժամանակյա օպերացիա է իրականացրել երկրի 13 նահանգներում և բերման ենթարկել ավելի քան 3 տասնյակ մարդու: Ձերբակալվածների մեջ են հայտնի «Զաման» ընդդիմադիր պարբերականի խմբագրական խորհրդի ղեկավար Էքրեմ Դումանլըն, ինչպես նաև մոտ 2 տասնյակ լրագորղներ: Ձերբակալվածները մեղադրվում են «Իշխանությունը զավթելու, զինված ահաբեկչական կազմակերպություն հիմնելու, ղեկավարելու, անդամակցելու, խարդախություն և զրպարտություն անելու մասին» հոդվածի հատկանիշներով:

Ermenihaber.am