Իրաքի թեմի առաջնորդը նամակով դիմել է արքայազն Չարլզին

Միջազգային13:34, 10 Մարտ 2015

Իրաքի թեմի առաջնորդը նամակով դիմել է արքայազն Չարլզին

Հայ առաքելական եկեղեցու Իրաքի թեմի առաջնորդ Ավագ արքեպիսկոպոս Ասատրյանը ապրիլի 24-ին Թուրքիայի իշխանությունների կողմից Դարդանելում կազմակերպվելիք միջոցառումներին Անգլիայի արքայազն Չարլզի և որդու` Հարրիի մասնակցության վերաբերյալ հայտարարություն է տարածել:

Արքայազն Չարլզին և նրա որդուն ուղղված նամակ-հայտարարության մեջ արքեպիսկոպոս Ասատրյանը հիշեցրել է Հայոց ցեղասպանության հարցում Անգլիայի ունեցած պատասխանատվության մասին: Այս մասին գրում է Թուրքիայում հրատարակվող «Ագօս» հայկական շաբաթաթերթի կայքը:
Հայ բարձրաստիճան հոգևորականը նամակում նշել է, որ ապրիլի 24-ին տեղի ունենալիք միջոցառումներն իրականում ոչ թե միտված են Դարդանելի ճակատամարտի հիշատակմանը, այլ դրանք մի ռասայի հիշողությունները ոչնչացնելու օրինակ են:

Ասատրյանը, ով Դարդանելում կազմակերպվելիք միջոցառումները որակել է որպես անգթության և ժխտողականության հաղթանակ, հիշեցրել է, որ դաշնակից պետությունները (Անտանտ) 1915-ի դեպքերը ճանաչել են, որպես մարդկության դեմ ուղղված հանցանք:

Արքեպիսկոպոսն ուշադրություն հրավիրելով այն հանգամանքին, որ Ուինսթոն Չերչիլը ճանաչել է Հայոց ցեղասպանությունը, նշել է. «Անգլիան, որ խոստացել էր պատժել ցեղասպանության մեղավորներին, այժմ` 21-րդ դարում, պարգևատրում է մի ազգի բնաջնջման պատասխանատուներին»:

Նամակի վերջում հիշեցվում է Ադոլֆ Հիտլերի «Հայերի կոտորածն այժմ ո՞վ է հիշում» արտահայտությունը և արքայազնին հորդոր հղվում չմասնակցել նշյալ խոսքերը հիշեցնող միջոցառումներին:

Աղբյուր` Ermenihaber.am