Թուրքիայում «Նիշանյանի տներ»-ը քանդելու որոշում է ընդունվել

Հասարակական08:43, 13 Մարտ 2015

Թուրքիայում «Նիշանյանի տներ»-ը քանդելու որոշում է ընդունվել

Թուրքիայի Իզմիր նահանգի հարավում գտնվող իր տուրիստական նշանակությամբ հայտնի Սելչուք շրջանի իշխանությունները որոշում են կայացրել ապամոնտաժել պոլսահայ անվանի մտավորական, գրող, լեզվաբան Սևան Նիշանյանին պատկանող իջևանատները: Վերջիններս Թուրքիայի հյուրանոցային համալիրների մեջ հայտնի են «Նիշանյանի տներ» անվանումով:

Տարիներ առաջ կիսաքանդ ու խարխուլ վիճակում գտնվող այդ շինությունները իր սեփական միջոցներով վերակառուցած Նիշանյանին թուրքական դատարանը երկարաժամկետ ազատազրկման էր դատապարտել՝ ապօրինի գործունեություն ծավալելու մեղադրանքով:

Թուրքիայում լույս տեսնող հայկական «Ակոս» թերթի կայքը տեղեկացնում է, որ Սելչուքի ՏԻՄ-ը նշյալ շինություններն ապամոնտաժելու որոշման մասին արդեն գրավոր տեղեկացրել է «Նեսին» հիմնադրամին, որին Նիշանյանը նվիրաբերել էր իր իջևանատները:

Գրության մեջ ասվում է, որ, համաձայն Իզմիրի Մշակութային արժեքների պահպանման տարածաշրջանային վարչության տնօրինության 2014թ մարտի 14-ի որոշման՝ շինությունները «ենթակա են շտապ ապամոնտաժման», քանի որ դրանք «ապօրինի կառույցներ են»: Նույն որոշման համաձայն՝ եթե շենքերի ապամոնտաժումը չկատարվի, դա կիրականացնի Սելչուքի ՏԻՄ-ը, իսկ համապատասխան ծախսերը պարտավոր կլինի հոգալ «Նեսին» հիմնադրամը:

Հիշեցնենք, որ «Նիշանյանի տներ»-ի ապամոնտաժման վերաբերյալ Իզմիրի նահանգային իշխանությունների կայացրած մի շարք որոշումներին ի պատասխան Նիշանյանը 2010-ին խնդրո առարկա տարածքում կառուցել էր «Ընդդիմության աշտարակ»:

Իր նկատմամբ իրականացվող թուրքական իշխանությունների այդ հետապնդումները Նիշանյանը պատճառաբանել է իր հայ լինելու հանգամանքով: «Այդ տներն իմ երեխաներն են… Կառուցել չգիտեն, սակայն երբ հարցը վերաբերում է ավերելուն, առյուծներ են»:

Աղբյուր` Ermenihaber.am