Թուրք հաքերները հարձակվել են «New York Times» -ի կայքերի վրա

Միջազգային10:06, 28 Մայիս 2015

Թուրք հաքերները հարձակվել են «New York Times» -ի կայքերի վրա

«Թուրք հաքերների թիմ» ցանցահենների կազմակերպությունը հաքերային հարձակման է ենթարկել ամերիկյան «New York Times» թերթի ինտերնետային կայքերը՝ արգելափակելով դրանք:

Թուրքական «haberler.com» լրատվակայքի համաձայն՝ հարձակման պատճառն օրերս թերթում հրապարակած «Թուրքիայի գլխավերևում սև ամպեր են կուտակվում» հոդվածն է, որով «New York Times» -ը կոչ էր անում ԱՄՆ-ի և ՆԱՏՕ-ի դաշնակից երկրներին՝ քայլեր ձեռնարկել Թուրքիայի նախագահ Ռեջեփ Թայիփ Էրդողանի և իշխող «Արդարություն և զարգացում» կուսակցության գործադրած կամայականությունների ու բռնությունների դեմ:

Հաքերների նշյալ արարքը հայրենասիրական քայլ համարող աղբյուրը գրում է. «Թուրք հաքերների թիմ»-ի տասնյակ հայրենասեր հաքերները Թուրքիայի ներքին կյանքում քաոս ստեղծել ցանկացող «New York Times»-ի կայքերին գիշերային ժամերին միաժամանակյա հաքերային հարձակումներ են իրականացրել»:

«New York Times»-ի անգլերեն homedelivery.nytimes.com և իսպաներեն es.nytimes.com կայքերը, ինչպես նաև՝ blog.nytimes.com հասցեով բլոգը, app.nytimes.com հավելվածը և register.nytimes.com ռեգիստրացիոն համակարգը ժամեր շարունակ անհասանելի են եղել և մեծ վնասներ կրել:

«Թուրք հաքերների թիմ»-ի ղեկավար Զորրոքին հայտարարել է, որ հիշյալ հոդվածծով Թուրքիայի նախագահին այդ կերպ ստորացնելն ու տարբեր ուժային կառույցների համար որպես թիրախ ցույց տալը ակնհայտ միջազգային բռնության նախաձեռնություն է:

Զորրոքին նաև նշել է, որ հանուն Թուրքիայի ամբողջականության պահպանման իրենք շարունակելու են հարձակումները իրենց դեմ դուրս եկած ցանկացած ուժային կառույցի դեմ:

Աղբյուր` Ermenihaber.am