«Նոր զարթոնք»-ը Եսայանին կոչ է արել «Քամփ Արմեն»-ը քաղաքական շահարկման առարկա չդարձնել

Հասարակական12:47, 02 Հունիս 2015

«Նոր զարթոնք»-ը Եսայանին կոչ է արել «Քամփ Արմեն»-ը քաղաքական շահարկման առարկա չդարձնել

Ստամբուլի Թուզլա շրջանի հայկական մանկատան ամառային ճամբարի՝ «Քամփ Արմենի» ապամոնտաժման դեմ ու հայկական համայնքին հանձնելու համար պայքարող «Նոր զարթօոք» նախաձեռնող խումբը հայտարարություն է տարածել ճամբարի հարցը քաղաքական նպատակներով շահարկումների վերաբերյալ:

«Kamparmen.org» կայքում հրապարակված հայատարարության մեջ նշվում է, որ «Փարոս» ամսագրում տպագրված Թուրքիայում իշխող «Արդարություն և զարգացում» կուսակցության պատգամավորի թեկնածու Մարգար Եսայանի խոսքերն այն մասին, թե ճամբարը վերադարձվել է հայ բողոքական եկեղեցու հիմնադրամին, սուտ է :

«Դժվարանում ենք հասկանալ գովազդային նպատակներով պատրաստված այս նյութի իմաստը, այն դեպքում, երբ մենք շարունակում ենք Քամփ Արմենի համար մղվող պայքարը:

Ձեզ հետևյալ հարցերն ենք ուղղում.

1. Դուք ասում եք, որ որբանոցը վերադարձվել է, այդ դեպքում որտե՞ղ է հիմնադրամի անունով գրանցված սեփականության վկայականը: Եթե Ձեր ձեռքում կա, անհապաղ հրապարակեք:

2. Այս սուտ լուրը և ԱԶԿ-ի գովազդը հրապարակելու համար որքա՞ն գումար եք ստացել:

3. Նման սուտ տարածելով լրագրողությամբ զբաղվել շարունակելը ո՞ր բարոյական նորմերի հետ եք համադրելու»,- նշված է «Նոր զարթոնք»-ի հայտարարության մեջ:

Վերջինս կոչ է արել Մարգար Եսայանին հրաժարվել Թուզլայի հայկական մանկատունը և «Քամփ Արմենը» ընտրարշավի քարոզչական նյութ դարձնելու փորձերից:

Խմբի հայտարարության մեջ նշվում է, որ 27 օր է պայքարում են ճաբարի համար և շատ լավ գիտեն, թե որ քաղաքական կառույցներն են կասեցրել ապամոնտաժումը, ովքեր են իրենց հետ պայքարել, իսկ ովքեր՝ անգամ ապամոնտաժման օրը եղել դիտորդի դերում, իսկ հետո ընկել քաղաքական շահատակության հետից:

Ըստ հայտարարության՝ Մարգար Եսայանը, որը գործընթացը ավելի երկարացնելուց և մարդկանց մտքերը խառնելուց բացի որևէ ներդրում չի ունեցել, իր հայտարարություններով հայ ժողովրդին ոչ թե օգուտ, այլ վնաս կարող է տալ:

«Ակնկալում ենք, որ այս դիրքորշումից հրաժարվելով՝ նա կաշխատի հանուն ճամբարի վերադարձման»,- հույս է հայտնվում հայտարարության մեջ:

Աղբյուր` Ermenihaber.am