Թուրքիայում դեռ որոշ ժամանակ կշարունակվեն տնտեսական տատանումները

Տնտեսական10:57, 08 Հունիս 2015

Թուրքիայում դեռ որոշ ժամանակ կշարունակվեն տնտեսական տատանումները

Japon Credit Rating (JCR) Eurasia վարկանիշային գործակալության տնօրեն Օրհան Օքմենը Թուրքիայում հունիսի 7-ին կայացած խորհրդարանական ընտրություններից հետո հանդես է եկել առաջիկայում սպասվող հնարավոր ֆիանսատնտեսական զարգացումների վերաբերյալ մեկնաբանություններով:

Թուրքական «Hürriyet» պարբերականի համաձայն՝ Օքմենը նշել է, որ թեև խորը ֆինանսական ճգնաժամերը Թուրքիային չեն սպառնում, այնուամենայնիվ, նախընտրական շրջանում կուտակված խնդիրների պատճառով երկրում դեռ որոշ ժամանակ կշարունակվեն տնտեսական տատանումները:

«Ընտրությունները հնարավորություն են ստեղծել Թուրքիայի ներքին համերաշխության և հասարակական փոխըմբռնման ստեղծման ու մեծացող քաղաքական լարվածության վերացման համար: Մեծ սխալ կլինի համարել, թե ընդդիմության հետ հաշվի նստող կոալիցիայի ստեղծումը կարող է անկայունություն առաջացնել ֆինանսական դաշտում: Թուրքիան նախաձեռնող, հմուտ և ճգնաժամների հարցում բավական փորձառու ներդրողներ ունեցող մի երկիր է, ինչը նոր ձևավորվող կառավարության ամենակարևոր օգնականն և երաշխիքը կլինի»:

Ըստ Օքմենի՝ առաջիկայում դեռ որոշ ժամանակ սպասվող քաղաքական և տնտեսական տատանումների առաջացրած բացասական հետևանքները հնարվորինս կանխարգելելու համար անհրաժեշտ է չուշացնել նոր կառավարության ձևավորումը, իսկ Թուրքիայի կենտրոնական բանկը պետք է ամեն կերպ փորձի պահպանել միջազգային ասպարեզում իր ձեռք բերած դրական դիրքն ու անկախությունը:

Աղբյուր` Ermenihaber.am