«Հայոց ցեղասպանություն» բառակապակցության պատճառով Թուրքիան անընդունելի է համարել ԵԽ զեկույցը

Միջազգային08:10, 11 Հունիս 2015

«Հայոց ցեղասպանություն» բառակապակցության պատճառով Թուրքիան անընդունելի է համարել ԵԽ զեկույցը

Եվրախորհրդարանը (ԵԽ) Թուրքիայի մասին զեկույց է ընդունել, որը ստացել է ձայների մեծամասնությունը՝ 492 կողմ և 92 դեմ:

Թուրքական «Mansethaber» լրտավական կայքի բնորոշմամբ` դա Թուրքիայի հասցեին ամենակոշտ ձևակերպումներ պարունակող զեկույցն է, որ երբևէ ընդունվել է: Զեկույցում մեջբերվում է Եվրամիության (ԵՄ) կողմից ընդունված ապրիլի 15-ի որոշումը, որով ԵՄ-ն Թուրքիային կոչ էր անել ճանաչել Հայոց ցեղասպանությունը:

Թուրքիայի Եվրամիության հարցերով նախարար և գլխավոր բանագնաց Վոլքան Բոզքըրը հայտարարել է, որ զեկույցն անընդունելի է, քանի որ տեքստում առկա է «Հայոց ցեղասպանություն» բառակապակցությունը: Այդ պատճառով սա կլինի ԵԽ-ի պատմության մեջ Թուրքիայի հետ հարաբերություններին վերաբերող առաջին զարգացման զեկույցը, որը Թուրքիայի կողմից կլինի մերժված և անընդունելի»,- նշել է թուրք նախարարը:

Թուրքական «Mynet» լրատվական կայքը տեղեկացնում է, որ զեկույցում քննադատվել են Թուրքիայում խոսքի ազատության սահմանափակումները, սոցցանցերի և այլ կայքերի արգելափակումը, լրագրողների ձերբակալություններն ու նրանց նկատմամբ իրականացվող հետապնդումները:

Անդրադարձ է կատարվում հունիսի 7-ին տեղի ունեցած խորհրդարանական ընտրությունների արդյունքներին, որի միջոցով ընտրողները ներկայացրել են փոփոխություններ անելու իրենց ցանկությունը: «Դա Թուրքիայում ժողովրդավարության և քաղաքացիների ժողովրդավար ոգու ցուցանիշն է»,- նշված է զեկույցի մեջ:

Եվրախորհրդարանը Անկարայի կոչ է արել ձևավորել այնպիսի կառավարություն, որը կարագացնի ժողովրդավարացման բարեփոխումների գործընթացը:

Աղբյուր` Ermenihaber.am