Էրդողանը հայտարարել է, որ թույլ չի տա Թուրքիայի հարավում նոր պետություն ձևավորել

Տարածաշրջան11:23, 29 Հունիս 2015

Էրդողանը հայտարարել է, որ թույլ չի տա Թուրքիայի հարավում նոր պետություն ձևավորել

Թուրքիայի նախագահ Ռեջեփ Թայիփ Էրդողանը հայտարարել է, որ թույլ չեն տա Թուրքիայի հարավում նոր պետություն կազմավորել (նկատի ունի քրդական պետություն-խմբ): Էրդողանն այս հայտարարությունն արել է Թուրքիայի հետ սահմանակից սիրիական քրդաբնակ Քոբանի քաղաքում տեղի ունեցած քրդերի և «Իսլամական պետություն» (ԻՊ) ահաբեկչական կազմակերպության միջև բախումների ֆոնին: Քոբանիում քրդերը նկատելի հաջողություններ են գրանցել ԻՊ-ի գրոհայինների դեմ պայքարում:

Թուրքական «Habertürk» լրատվական կայքի տեղեկացմամբ՝ Էրդողանը, խոսելով Քոբանիում կատարվող դեպքերի մասին, ընդգծել է, որ այդ դեպքերը որոշ շրջանակաների կողմից որպես պատրվակ են օգտագործվում Թուրքիան ևս մեկ անգամ վտանգի տակ դնելու համար:

«Դիմում եմ իմ ողջ ազգին, ամբողջ աշխարհին: Երբեք թույլ չենք տա, որ Սիրիայի հյուսիսում, մեր հարավում մի պետություն ձևավորվի: Ուզում եմ, որ սա հայտնի լինի: Ինչ գնով ուզում է լինի մենք շարունակելու ենք պայքարը այս հարցում»,- ասել է Թուրքիայի նախագահը:

Աղբյուր` Ermenihaber.am