Թուրք ընդդիմադիր կառույցը քննադատել է հայ երաժշտին ուղղված վիրավորանքները

Հասարակական13:23, 02 Հուլիս 2015

Թուրք ընդդիմադիր կառույցը քննադատել է հայ երաժշտին ուղղված վիրավորանքները

Թուրքիայի գլխավոր ընդդիմադիր ուժը համարվող «Ժողովրդահանրապետական» կուսակցության (ԺՀԿ - CHP)՝ Մշակույթի և արվեստի հարթակը, 2015թ. հունիս ամսվա վերաբերյալ «Արվեստի ոլորտին ուղղված ճնշումները և գրաքննությունը» թեմայով հաշվետվություն է հրապարակել:

Թուրքական «Demokrathaber» լրատվակայքի տեղեկացմամբ՝ հաշվետվության մեջ տեղ են գտել արվեստի ճյուղերի սահմանափակումների և բռնությունների 10 դեպք: Դրանց շարքում ուշագրավ են հատկապես հայերի և Հայաստանի նկատմամբ անհանդուրժող վերաբերմունքի օրինակները:

Մասնավորապես, հաշվետվությունում քննադատվել են հայազգի դաշնակահար Տիգրան Համասյանի՝ Անիի ավերակներում կազմակերպած համերգների վերաբերյալ Կարսի քաղաքապետ Մուրթազա Քարաչանթայի՝ ատելությամբ լի հայտարարությունները և գորշ գայլերի «Ülkü ocaklar» (Իդեալիստական օջախներ) անվամբ ծայրահեղական աջակողմյան երիտասարդական կառույցի Կարսի մասնաճյուղի ղեկավար Թոլգա Ադըգյուզելի՝ Կարսի փողոցներում «հայերի որսի դուրս գալու» սպառնալիքները:

ԺՀԿ-ի հաշվետվության մեջ տեղ է գտել նաև «Մարդասիրության հուշակոթողի» առթիվ խտրականության և ատելութան դրսևորումները:

Թուրք քանդակագործ Ահմեթ Աքսոյի հեղինակած «Մարդասիրության արձանը» կառուցվել էր 2006թ.՝ Կարսում՝ որպես Հայաստանի հանդեպ բարյացակամության և համերաշխության խորհրդանիշ: Էրդողանը մի առիթով այդ արձանի մասին հյատարարել էր, թե այն «այլանդակ» տեսք ունի, ինչից կարճ ժամանակ անց դեռ անավարտ արձանը ապամոնտաժվել էր՝ պահպանության գոտում կառուցված լինելու պատրվակով:

Արձանի վերաբերյալ վիրավորական արտահայտության համար դատարան դիմած քանդակագործը 10 000 թուրքական լիրայի փոխհատուցում է շահել: Դատը շահելուց հետո տված հարցազրույցի ժամանակ լրագրողը Աքսոյին հարցրել է, թե արդյոք ներդնելու է շահած գումարը նոր արձաններ կառուցելու գործում: Ի պատասխան՝ քանդակագործն ասել է. « Ես հարամ փողն արձանի կառուցման համար չեմ օգտագործում»: Այս արտահայտության համար 2015թ. հունիսին Աքսոյի նկատմամբ քրեական գործ է հարուցվել ՝ Էրդողանին վիրավորելու մեղադրանքով և պահանջվել է 4-8 ամիս ազատազրկում: Աքսոյն իրեն մեղավոր չի ճանաչել:

Աղբյուր` Ermenihaber.am