Ստամբուլում ձերբակալվել և կալանավորվել է ադրբեջանցի ահաբեկիչ Աբդուլլաևը

Իրավական09:50, 28 Հուլիս 2015

Ստամբուլում ձերբակալվել և կալանավորվել է ադրբեջանցի ահաբեկիչ Աբդուլլաևը

Ստամբուլում ձերբակալվել է «Իսլամական պետություն» (ԻՊ) ահաբեկչական կազմակերպությանն անդամակցող ադրբեջանցի Աբդուլլահ Աբդուլլաևը, ով հայտնի է որպես ԻՊ-ի հրահանգիչ Ստամբուլում:

Այս մասին տեղեկացնող թուրքական «Radikal» պարբերականը հայտնում է, որ Թուրքիայի ամբողջ տարածքում ահաբեկչական կազմակերպությունների դեմ ոստիկանական հատուկ օպերացիաներ են իրականացվում:

Դրանց շրջանակներում Ստամբուլի Չաղլայանի դատարան բերման է ենթարկվել 15 հոգի, որոնցից 10-ը մեղադրվում է «Քուրդիստանի բանվորական կուսակցության» (ՔԲԿ-PKK), իսկ 5-ը՝ ԻՊ-ի հետ կապեր ունենալու մեջ:

Ստամբուլի քրեական դատարանի որոշմամբ՝ ԻՊ-ի հետ համագործակցության մեջ մեղադրվող վերոնշյալ 5 անձանցից 3-ը կալանավորվել են:

Նույն աղբյուրի հաղորդմամբ՝ կալանավորվածների մեջ է նաև ադրբեջանցի Աբդուլլաևը, ում անվանում են «ԻՊ-ի ստամբուլյան էմիր»:

Աղբյուր` Ermenihaber.am